Omukiintu goomvula 19 oku li monkalo yi vule oonkondo dhe sho ta monithwa iihuna kaakwanezimo ye momukunda gwedhina Ohepa moshikandjohogololo Omulonga moshitopolwa shaHangwena. Nakuningilwa omahepeko ngaka ngoka edhina lye lyi shiwike koshikundaneki shika ashike itali tumbulwa, okwa ti uule woomvula mbali dha za ko okwa kala nokuthiminikilwa momilalo pamwe naamwayinagona osho wo omushiinda. Omukiintu nguka inaa enda mosikola nkene a valelwe, okwa li a lombwele oshikundaneki shika mongodhi, kutya okwa tameke okuhepekwa kaamwayinagona sho a li a tembukile koohekulu momumvo 2018 konima sho mbushe ngoka a li e mu tekula uule woomvula 17 a li e mu laleke megumbo lye. Okwa li a popi kutya okwa kala nokuya miihulo miihwa naamwayinagona yaali sho okanona ke ka li ke na oomwedhi, ta ti oshinima shika okwe shi lopota kuyinakulu osho wo kuhekulu nelalakano lyokugamenwa. Ashike aakulupe mbaka yaali anuwa oya kala nokugama kombinga yaamboka taye mu ningile omahepeko ngoka gopaihulo, gumwe gomaamwayinagona okwa li a zi mo megumbo sho aashiinda ya tseya oshinima shika.
“Konima yoku ya nangame miihulo, aamwamemegona ohaya ka tala omushiinda e ye wo a ye nangame miihulo, nuuna nda tinda ohaya dhenge ndje nokutya kandi na mikalo, shoka osha li nduno sha thiminike kuku a ithanene ndje tatekulu omumwayina gwameme e ye a kuthe ndje odhino,” ta fatulula ngaaka.
Nakuningilwa omahepeko ngaka oku na okanona koomvula mbali, nokwa li a popi kutya olundji oha lala poshipale nokamwanamati oshoka okwa tila okudhengwa megumbo.
“Osoondaha ya za ko mumwamemegona okwa li a ithana omumati gopuushiinda a ye nangame miihulo shaa li pahalo lyandje miihwa, nokwa li e mu lombwele kutya ngele onda tindi ne mu lombwele eye a dhenge ndje. Inandi tinda oshoka onda li nda tila.”
“Konima yiilonga mbyoka inandi shuna kegumbo, onda yi ashike poshipale ee tandi lala momutala gwondumba yiilya mbyoka ya teywa nomumwandje. Onda kala ndi shi shi nale kutya otandi ka dhengwa ngele nda yi kegumbo. Sho kwa shi onda li nda yi kegumbo, nonda adha kuku pamwe natatekulu omumwayina gwameme osho wo mumwamemegona ngoka a thiminikila ndje iihulo taya ilongekidhile okudhenga ndje. Onda li nda dhengwa nokugulu kwandje okwa zinda,” osho a hokolola ngaaka newi lya mbandapala.
Kansela gwoshikandjohogololo Omulonga Erickson Ndawanifwa okwa li a lombwele oshikundaneki shika kutya oshinima shika otashi uvitha nayi noonkondo, nokwa limbililwa kutya omolwashike opolisi osho wo aanambelewa yokuuministeli wuukashikekookantu inaawu ninga po sha mala. “Sho ndu uvu oshinima shika onda li nda tseyithile opolisi mbala ashike sigo oompaka kape na nando omuntu a mangwa po,” Ndawanifwa ta ti ngaaka.
Ta gwedha po kutya omukiintu nguka okwa pumbwa egameno oshoka mboka ya li ye na oku mu gamena ngashiingeyi oyo taye mu ningile omahepeko. A pulwa kombinga yoshiningwanima shika, omukuluntu gwopolisi moshitopolwa Ohangwena Simeon Shindinge okwa li a popi kutya oshinima shika ke shi shi nando. “Ngele kape na epeko lya patululwa, inandi shi uva, shuna kuNdawanifwa e ku lombwele shoka wa hala okuuva, nenge mu lombwela to ti na dhengele ndje,” osho a yamukula ngaaka nokuteta ko ongodhi ye.
Ashike omukwatakanithi gwomakonaakono giimbuluma mOhangwena Zacharian Amakali okwa li a lombwele oshikundaneki shika kutya aakonaakoni yopolisi oyi ipyakidhila noshinima shika notaya gongele uuyelele awuhe opo ya wape okupatulula iipotha.
“Otu shi shi notatu koleke omapopyo ngoka, ke shi okanona okashona okwa pita po poomvula 18, ota vulu okupatulula oshipotha ye mwene ashike sigo oompaka inapu patululwa oshipotha oshoka opo tatu shilipaleke omawuyelele,” ta ti ngaaka.