Jazema Hangero 

Umwe wovaimbure ozohongora motjitamba tjoviritje Mutjangatjike Bishop Muundjua (MBM) ma tja ehupo re ra zikamena kokuimbura otjiritje, “mbi pendukira kotjiritje e rarere kutjo”. 

Mutjanga wa kwaterwa mOtjinene, ekurire mo, nu omanyandera wina. Osikore wa kondjisa oimba na mbena wa utira mOtjinene na kahita kEpukiro. “Otjiritje mba kwatwa natjo, mo 1998 no 1999 e imbura mozosikore, mombura ndji 2000 otji mba uta nondjira yandje yotjiritje”. 

We kura ae puratena omizumbi vyOvaherero, Jackson Muṋingandu Kaujeua, Willie Mbuende noutjina nomuhiva nooviṋa mbye mu toka kokutja ma ute okuimbura otjiritje. 

Mutjangatjike wa ryanga omahi, Oamerika, Okananda, Obotswana, Oengland nomakwao. 

“Mba taara ozombatasaneno ozengi, e taara omakopi mOtjiuarongo ngandu kombatasaneno yomizumbi vya Namibia (Onamibia Music Awards). “Otjiritje mba utira kOweikona ya Tjambambi, Ozongazona za Mbae (Millenium, e kauta Orimemba tjazumba e kauta Ovandu va Upamba mo 2008.” 

Ombura ndji o-2012 otje kerikuramena kuye omuini. 

“Otjiritje tji novimariva posi ya matji zu kove kutja wa yende natjike nu mo wondjo momukee muano. Otjiritje katjiṋa tjomundu kangamwa opuwo wa ri oruhere wekuta mo munu kutja wa yenene okuiimbura, mwe ya omarundurukiro omengi,” Mutjanga ma tja. 

Na ryama komurungu ama raisa ohepero yokukerihonga kozonganda zomahongero tjimuna College of the Arts ousupi (Cota). “Otjiritje tja yera ondondo nu tja rira omusiki keṱupa, twa rundurura noviketara, ozongoma novihumba vyouye wakandino pekepeke. U sokukara nondjiviro. Omatokero omanene okurirandisa.”

Mutjanga ma ningire ovaimbure ovape ve kondje omiano avihe vyokurirandisa orondu ombi tjiukisa omundu tjazumba we ningire kokutja ve kare nomuretima tji mave utu otjiritje.