Jazema Hangero
Omitanda ngunda avi hiya toorora kutja mavi vanga okurihonga omihunga viṋe, vi sokukonḓonona ouzeu mburi motjirongo nozondendera, orukondwa nehi mu vya tura ave rihongo omihunga mbi mavi zengurura ouzeu pu ve rarera nokupendukira.
Kotjimuti Ndjarakaṋa, omuhongwa omukuru wOunama ma tja. Otjovandu mberi moruveze rwouye wakandino ovahongwa ngave rihonge Ouhoze waKaseruseru (Artificial Inteligence), (Ondjeverero yOviuṋe vyOmombepo (Cybersecurity), Ounongo waKandino ndi wOndjivisiro (IT), Ounongo waKandino ndi wa Mbya tjama kOvirihongwa vyOvivarero (Engineering Science Technology), Otutumbo nOvikunwa, nOunongo wOvikurya (Food Science) tjinene Ounongo wOtuhapo (Plant Science). Nao ngahino otji mape kara omuti wotjikuryoma. Otjo nai tji tjiri ongendo kovaṱuta mbe kondjera mozondendera za Eiseba. Ndjarakaṋa ma tja, otjiwaṋa tji sokutanaura omaunguriro wouṱuta ave utu okuungura ouṱuta mbu mau ve twara komurungu. Noondarire Orutuu rwOuhatoi wOmahongero mOvyouṱuta ngave kondje okukara naro kokutja ve tjiwe omayendero, ovirasewa vyovinamuinyo pamwe nomaungurisiro wongorongova nomerinaneno otjongetjesa pendje nokuungura ouṱuta wokunwa momaere uriri nokuyereka ovarumendu ovakwao porui.
Korusenina Ndjarakaṋa ma raisa kutja ovahongwa okuhina okurihonga, okuhina okuyandja ombango komahongero pamwe notuveze pu ve pendukira ooviṋa mbi ve ngundiparisa mozosikore. Tjazumba ovanene okuhina okusekamena omahongero wawo nokuvepa oruvara kutja okukatara omambo wovanatje nokuyenda kozombongarero zozosikore okukazuva ouzeu wawo. Tjeri tjimwe tjoviṋa mbi mavi hepa okuripurirwa kokutja ovahongwa ave ha kara nomatokero mondjira yawo yomahongero. Ma raisa kutja omiano vyomahongero mbi ungurisiwa i yOmiṱiri tji mai hongo vi yenena okurira otjipwite tji matji tjiti kokutja omuatje a ha toora ondjiviro nawa wina, mo nao Ozomiṱiri otji maze sokurundurura omiano vyazo vyomahongero kokutja ape ha kara nomuhongwa ngu ma isiwa pehi.
Ndjarakaṋa we rihonga Ondingrii yOmananeno wOndwi yEhinga pOIUM, kombunda e kerihonga Ondingirii yOumiṱiri weraka rOtjiherero nOtjiingirisa pOUNAMA. Nai u nonḓero yokuryamisa omahongero we komurungu, mo nao otja munu kutja ohepero okuhaṋasana ondjiviro onḓiṱi ndje nayo ku notjiwaṋa naṋi mai vatere okurongerisa ovahongwa mbu mave utu nondjira yokurambera ondiyo yosikore kutja ovondondo ondenga poo kozonganda zomahongero wokombanda.
