OMPUMBU – Aakalimo yomomikunda Ompumbu, Okaku kaNangula, Onampinda nomikunda dhi li popepi nondjila yokuya kOmungwelume, oya ti aantu oyendji oya kanitha oomwenyo mondjila onene yi li pokati kOshakati nOmungwelume, ya lyatwa kiihauto omanga taya zi potombo.
Opolisi moshitopolwa shaShana oya ti omwedhi ihagu piti po, inaaya lopotelwa omuntu nenge aantu ya lyatelwa mondjila ndjoka, ya adhika taya zi pomahala gokuninwa.
Opolisi otayi kumagidha aakalimo yomomikunda Ompumbu, Okaku kaNangula, Onampinda nomikunda dhi li popepi nondjila yokuya kOmungwelume ya kale taya tala nawa oohauto uuna taya taaguluka opate uuna ya nwa mo “mOkasangwa”, nenge ye li kohi yiikolitha. Omukuluntu gwopolisi moshitopolwa shaShana Naftal Lungameni Sakaria okwa popi ta ti ondjila ndjoka oya faalela oomwenyo dhaantu oyendji taya lyatwa kiihauto.
Ta ti, kayi shi nando ombwaanawa okuhingililwa.
“Ondu uvite kutya ondjila ndjoka oya pumbwa okutulwa uutuntu wokushunitha pevi ondapo yoohauto owundji,’’ ta popi ngaaka. Sakaria ta ti, uupyakadhi omalovu, nuunene otombo tayi nuwa pomindhingoloko mpoka kayi na luthuwo, iihauto kopate ihaya kala ye yi wete. Ta kumagidha ta ti, aantu naya kale taya nu koombinga hoka haya zi, ya yande okutaaguluka oopate omanga ye li kohi yiikolitha.
“Naya kale haya pula omakwatho kookuume kawo ye li monkalo yi li nawa ye ya taagulikithe uuna ya mono kutya oya gwanitha. Natango aahingi naya kale taya hingi kashona osho wo nuukeka ngele taya hingi pomindhingoloko mpoka,” ta kumagidha ngaaka.
Kansela gwoshikandjohogololo shaKatana Edmund Iishuwa okwa ti, iiponga mbyoka ohayi etwa kuuluudhe mondjila moka.
“Ondjila kayi na omalamba gomomapandaanda, okwaluundha unene, aantu ihaya mono ko uuna taya taaguluka opate, natango kape na omandhindhiliko ge li po kutya aantu naya hingile pongapi,” ta ti ngaaka. Ta gwedha po ta ti, ehangano lyi na sha noondjila olya pumbwa okukutha onkatu oshoka ondjila ndjoka otayi kanene oomwenyo dhaantu. Omupopiliko mehangano lyi na sha noondjila Hileni Fillemon okwa ti, aanambelewa otaya ka ninga omapekapeko mondjila ndjoka tayi nyenyetwa opo ya kundathane nokutokola nkene ye na okuyambindhindha nokukandula po uupyakadhi mboka.
Otombo
Samuel Shikongo gwomomukunda Okaku kaNangula okwa ti, ondjila ndjoka oya pimbila, kehe konima yiiwike yontumba out uvu ashike omuntu a lyatwa ta zi pomahala gotombo.
“Otombo oyo uupyakadhi unene, omuntu gumwe oha menekele oongoma dhotombo okuza po07h00, ihe kegumbo otaka shuna ngele kwa luudha, esiku alihe okuuhala ashike ta nu otombo,’’ ta nyenyeta ngaaka.
Ta ti, omuntu sho ta shuna kegumbo ke wete ko, iihauto ite yi mono. Ta gwedha ko ta ti, shoka hashi dhungilwa motombo ke shi shi.
Maria Shikongo ngoka ha landitha otombo momukunda Onampinda okwa ti, ohashi uvitha nayi omuntu ta zi puye, ihe konima yethimbo okwa lyatwa kohauto.
“Itatu vulu okutidha ookasitoma dhetu uuna dha kala po ethimbo, oshoka oshimaliwa osho tatu kongo, nonando hatu kala ngaa twa hala oku ya lombwela uuna ye li pokugwanitha,’’ ta po pi ngaaka. Sonia Shikalepo okwa ti, ohe ya okulanditha okapana ke puundunda wotombo oshoka opo pe na ookasitoma dhe, ashike okwa koneke kutya otombo ihayi kumwa ihe ohayi kola ashike.
“Otatu indile aaleli yetu osho wo mboka taya vulu okweeta po elunduluko opo ondjila ndjika yaa lyatelwe we aantu yeshi ninge mbala oshoka aamwameme otaya manwa po kiihauto,’’ ta indile ngaaka.
Ta kumagidha wo aahingi yiihauto ya kale taya hingi kashona.
Aanasikola.
Aakalimo yomikunda moka natango oya nyenyeta wo aanona haya tumwa ootombo kaavali, yamwe ohaya nu pamwe nayo momagumbo.
Aanona ohaya monika taya ende kooha dhopate ya humbata uundini wotombo, shoka tashi teyagula po onakuyiwa yaanona.
Aanasikola yamwe natango yopomikunda mpoka osho wo yokolukanda Oshoopala oya thigi po oosikola ya ka kalela aalandithi yiikombo poshana yopOmpumbu, mpoka ya kutwa ya kale taya yuyu iikombo.