Festus Hamalwa
Commissioner koshikondo shomavyulonghalo needolongo moNamibia Sam Shaalulange ota hokolola ta ti etunhilo lombuto yoCovid-19 otali ende nawa komavyulonghalo. Okwa ti eshi otashi yandje oshihopaenenwa shiwa kovanhu opo va kale navo va mona omhito okukala va tunhilwa.
Meenghundafana a ninga naKundana Shaalulange okwa popya ta ti ovanadolongo ohava holoka momwaalu munene okuya ketunhilo lombuto yoCovid-19 eli li li hali yandjwa komavyulonghalo ayeshe moshilongo.
Okwa ti oshikondo shavo osha kala nokukala tashi yandje ehongo kovanadolongo kombinga yefimano lovenda yoCovid-19 naashi osha eta opo ovanadolongo vahapu va kale va ka tunhilwa.
Okwa yelifa ta ti mopaife ngaha ovanadolongo ve li 1291 ova tunhilwa oCovid-19 komavyulonghalo ayeshe moshilongo, omanga ovambelewa ve li 268 ova tunhilwa ovenda yotete, omanga ovanambelewa va tunilwa ovenda onhivali ove li 100.
Shaalulange okwa weda po ta ti omwaalu vovanhu ve li komavyulonghalo va kwatwa kombuto yoCovid-19 owa shuna pedu neenghono shaashi ovanadolongo ohava kala tave liufa komilandu edi da tulwa po doCovi-19.
“Mopaife ngaha kape na omunadolongo e na ombuto yoCovid-19 komavyulonghalo ayeshe moshilongo, omanga ovambelewa ve li vahetatu ovo ashike ve na ombuto yoCovid-19 paife,” Shaalulange ta ti.
Okwa weda po ta ti okudja omudo wadjako eshi moshilongo mwatukuka ombuto ei okwa didilikwa ashike ovanadolongo ve li vanhee va fya kombuto novanambelewa veli 10 va fya kombuto ei.
Shaalulange okwa kunghulila oshiwana ngeenge tashi shi uya okutalela po ovakwapata vavo v eli meedolongo opo va kale tave liufa komilandu doCovid-19 edi da tulwa po komavyulonghalo.