ONDANGWA- Ofamili yaSalom Nicanor (41) ou vati a dipawa ndele ta tetwa oilyo youlumenhu waye kukaume kaye oya ti oya hala omukwapata wavo a fudikwe e na oilyo yaye ei ya tetwa ko kukaume kaye.
Onghela ofamili okwa li ya hokola komhangu momwaalu muhapu tai kwena omukwapata wavo oo a longelwa omunyonena komulumenhu womukwaita metanga leameno.
Ofamili okwa li ya ngudumana onghela komhangu yaMangestalata mOndangwa tai ti omutamanekwa ina pewa obooloha.
Ina ya nakufya Martha Nahole onghela okwa popya ta ti onghundana ei yefyo lomonamati ole mu denga pomutima shaashi paife iha kofa vali.
“Omolwashike a teta ko oilyo youlumenhu yokaana kange. Ota li oupule okupitila mokaana kange,” ta ti.
Okwa yelifa ta ti fiyo onena ina va mona ofamili yomutamanekwa yaya keumbo lavo okukapopifa ile okukundafana kombinga yoshikumungu eshi,” ta ti.
Omutamanekwa weedula 25 Andreas Sunday Kanyanga okwa nyenwa omhito yokulifutilamo modolongo pefimbo a holoka momhangu yaNdangwa onghela.
Oshibofa shaye sha undulilwa komafiku 18 Juni 2026 opo ku ningwe omakonakono omoule.
Opolifi oya hokolola tai ti omufekelwa ou vati konima eshi a teta ko oulumenhu wa mukwao okwa ya nayo keumbo lavo ndele teu xwike po nokonim okwe u fudika meumbo lambulavo.
Olutu laye ole li tuwa li li metale lomeva onyata, Osoondaxa efimbo longula modoolopa yaNdangwa komukwashiwana kwa li ta ende ponhele opo.
Omukulunhu koshikondo shokukonakona oimbuluma wopolifi moshitukulwa shaShana omupedu komufala Fredrik Ndjadila okwa koleka oshiningwanima eshi shinyanyalifa.
Opolifi oya hokolola tai ti Nicanor ou okwa hangika a kupulwa metale lomeva ashike okwa tetwa eefukwa odo di li koilyo yaye youlumenhu.
Opolifi oya kala nokuninga omapekapeko osho yo okupula moshiwana kwau e na ouyelele kombinga yoshiningwanima eshi.
Omufekelwa ou okwa kwatwa po Omaandaxa efimbo lokomatango mOndangwa konima eshi oshiwana sha yandja ouyelele kopolifi.
Opolifi oya koleka tai ti omufekelwa ohava di pomukunda umwe nanakufya, vo ookaume.
Otaku hokololwa kutya omufekelwa vati okwa sha ngifa nanakufya ou e li kaume mehangano olo ha li shangifa ovanhu okupewa oshimaliwa shokulongifa peenghali ngeenge omunhu a xulifa.
Opolifi oya hokolola tai ti konima eshi omufekelwa a ningilwa omapulapulo okwa popya kutya okwa dipaa kaume kaye shaashi okwa hala oshimaliwa osho ha shi yandjwa kehangano olo.
Vati omufekelwa okwa lombwela opolifi kutya oilyo youlumenhu yakaume kaye okwe fudika meumbo lavo ndele nokuixwika po.
Umwe womukwapata wanakufya okwa lombwela Kundana ta ti okwa kumwifwa koshiningwanima eshi molwashi omufekelwa okwa li ve na oukaume muwa nanakufya.
“Okwa li alushe hava ende ve li lamba vau ka keendingosho. Ohatu a nye okuitavela kutya omufekelwa oye a longla kaume kaye omunyonena ou shaashi okwa li ve na ekwatafano liwa,” ta ti.
Okwa ti omufekelwa oku na okukala a landela nanakufya omalodu efiku olo shaashi okuhole oku mu landela omakende malula.
Oshiningwanima eshi shomulumenhu a tetwa eefukwa osha tilifa oshiwana omo shina oumbada kutya mboli monooli omu na omidamba tadi longele ovanhu ominyonena.
Elenga la kula ta li wilike oshitunda shUukwambi Chief Ndilimani Iipumbu okwa ti ovanhu paife otava longo oikulumuna tashi pitile pamukalo wokulya oupule.
“Ovanhu vamwe ohava kala va tumwa va ka longele vakwao ominyonena nelalakano loku li ninga ovakengeli,” ta ti.
Iipumbu okwa ti onghundana ei otai lulumike nenghono shomunhu a tetwa oilyo youlumenhu waye.
Okwa ti mopaife ovanhu otava longele vakwao oilonga youshada molwashi ove na omalalakano onhumba.
Oshiwana osha lombwela Kundana tashi ti paife osha kwatwa koumbada wokuenda nookaume ile okaahewa kavo shaashi paife ovanhu otava longelwa ominyonena kuvakwao vopopi.
fhamalwa@nepc.com.na
