EENGODI- Ovakwashiwana vomomukunda Evale moshikandjohoololo shaEengodi otava ti ova hoolola molwashi ova hala Omupresidente ta landulako opo a kandule po omhumbwe yomeva.
Pefimbo Kundana a talela po oshikandjohoololo shavo ova hokolola tava ti epangelo ola longa okuvatungila ombola yomeva momukunda wavo ashike omeva alula. Ouministeli wounamapya neudo owa tunga eembola domeva heyali koikandjohoololo ya yooloka moshitukulwa shaShikoto.
Epangelo natango ole li pyakidila nokutunga eembola 13 mOshikoto noshoyo omatale ahetatu. Lusia Haihambo omukalimo womomukunda Evale okwa ti oku na omukumo kutya Omupresidente ou ta landulako ota ka eta omayakulo popepi ngaashi okutunga ofikola ina omuhandjofikola momukunda wavo.
“Otwa pumbwa ofikola ina omuhandjofikola shaashi ounona vetu ohava ende oshinano shile va uka keefikola dokukole,” ta ti.
David Silas naye hadi momukunda Evale okwa ti paife ohava teke omeva momifima molwashi eembola od ina omeva malula.
“Otuna elinekelo kutya omuleli wetu ou ta landulako momudo tau ya ota ka tunga opate iwa moshikandjohoololo shetu,” ta ti.
Okwa weda po ta ti ovaleli tava kalela oshiwana koikondo ya yooloka nava ka longe nondjungu okuyambidida oshiwana unene okuyandjaneka oupangelo.
Kansela woshikandjohoololo shaEengodi Protasius Neshuku okwa ti epangelo ota li twikile okuyandjaneka omayakulo unene tuu eembola domeva noshoyo eefikola.
“Otwa taalela eshongo linene leembola odo da tungwa kepangelo ashike ohadi di omeva alula,” ta ti.