OLUKONDA – Omupresidente Nangolo Mbumba okwa holola euvonayi sho anuwa aanyasha taya nuka ya landulula oongundu dhoompilameno ndhoka opo dhe ya ohela.
Mbumba okwa popi ngaaka Etiyali koshigongi shoSwapo shoka sha li kOlukonda moshitopolwa shaShikoto.
“Omwa landula aantu kaaye na elalakano lyasha, ihe otamu dhiladhila kutya ope na esiku mu ninge aaleli mu li moongundu ndhoka, itashi vulika,” ta nyenyeta ngaaka.
Ta gwedha po ta ti, ongundu Swapo oyo ashike ongundu yaanyasha. Mbumba okwa ti oya manga oondjato ya ilongekidhila okugandja ompito kaagundjuka ya lele oshilongo shika.
“Ihe ngele otamu nuka okuza koongundu dhoompilamena, otatu mu pele shike mu lele? Mu kanithe oshilongo shetu shoka natse twa thigilwa, aaye itatu shi ningi,” ta popi ngaaka.
Ta ti, aanyasha nuunene aakiintu naya pewe ompito okulela oshilongo shika okupitila mongundu Swapo.
“Katu na esiku tu gandje po oshilongo shetu, oshigwana shetu, uuhaku nelongo lyetu kaantu kaatu ya shi tse katu na eyinekelo muyo,” ta gwedha po ngaaka. Onkene sho tamu ka hogolola dhimbulukweni okuhogolola netompelo lyoshilongo shi kale miikaha iiwanawa, shaa teke po.
Mbumba okwa ti omasiku sho taga ka kala 27 okwa hala kehe gumwe a pite ongula ta hogolola omuulikwapresidente Netumbo Nandi-Ndaitwah, oshoka oye omupresidente gwoshili e na okulela oshilongo shika. “Ngame onda tegelela esiku ndyoka lyi thikane opo ndi gandje oonkondo dhandje komupresidente gwoshilongo a landula ko, Nandi-Ndaitwah, ngaashi kwa li nde dhi pewa,” ta ti ngaaka.
Ngoloneya gwoshitopolwa shaShikoto Penda Ya Ndakolo esiku ndyoka okwa kumagidha oshigwana she shaa landule oondjila dha puka, dhoongundu ndhoka dhaa shi sho tadhi ningi.
“Tse itatu tilithwa kaantu yaa shi sho taya ningi, katu na nayo noho, itatu popi aantu komadhina. Ohamu ningi ashike hela mwa mono omuntu ta ende mpeya ne omwa landula mo, omu ya shi peni? Ta nyenyeta ngaaka.
Ya Ndakolo okwa ti okwa hala kehe gumwe a li poshigongi mpoka kaa ka ninge nando epuko esiku lyomahogololo, ihe naya hogolole mondjila.