“Atushe otwa hangika twa kofa nale eshi vakwetu va lika keyoka, otwa uda ashike omukulupe ta konghola poshivelo shotuwa omu kwa li twa nangala e uya oku tu lombwela kutya okwa li keyoka komhadi.”
Aa omatumbulo aa Amos Shaanika ta hokolola nghee va kumwifwa koshiningwanima eshi ovakulupe vavali va lika keyoka mokati koufiku potundi 02h00 keehambo daWindhoek moshikandjohoolo shUvudhiya, moshitukulwa shaShana.
Okwa hokololela Kundana Etine ta ti ova ninga onghendabala yokunwefa ovakulupe omahooli, noku va tula omahooli apa va lika keyoka.
Shaanika oye umwe womwaava va hangika po pefimbo ovakulupe va lika keyoka lonhoka eshi kwa li va nangala mokabashu ke li mohambo oyo kwa li mu na ovakulupe va unga onhanda yokulikola okapuka.
Okwa hokolola ta ti okwa li ve li vaheyali va dja momukunda umwe va ka likola okapuka keehambo daWindhoek nova ninga ko oule woshivike tava likola okapuka. “Fye okwa li twa nangala motuwa konima yobaki omanga ovakulupe ovo va lika keyoka okwa li hava nangala mokabashu ka shaama notuwa omu kwa li hatu nangala,” Shaanika ta hokolola.
“Mokati koufiku otwa uda ashike omukulupe ou weedula 67 ta konghola potuwa omu twa nangala ta ti okwa lika koshiima komhadi. Okudja opo otwa penduka ndele hatu ka tala mobashu yavo, eshi twa fika mo otwa hanga mo eyoka lonhoka lile petalashe apa kwa li pa nangala ovakulupe.”
Shaanika okwa ti ova endelela okudipaa eyoka ndele tave li tula moshako opo li ka ningilwe omakonakono.
Okwa hokolola ta ti omukulupe weedula 63, Maria Onesmus, ou a xulifa eshi a lika keyoka mokaulu , kakwa li a uda po sha kutya okwa lika keyoka pefimbo opo.
“Otwa pakela oinima yetu oufiku oo ndele hatu shingi meendelelo twa uka kokapangelo kaNaanda opo tu twale omukulupe koshipangelo ashike manga tu li mondjila omukulupe ou a lika tete keyoka okwa popya ta ti otuwa na i kanghame manga shaashi vati ke wete ko, yee vati okwa fa ashike ta di omaxwilili molutu,” Shaanika ta hokolola.
Okwa ti nakufya okwe ke shi mona mo kutya okwa lika keyoka potundi 04h00 eshi va hangika nale tava twala omukulupe mukwao ou a lika xwiininwa kokapangelo.
“Onghee otwa ka mona kutya mboli Onesmus oye a lika tete keyoka, yee okwa li e na oudiyo uhapu molutu shaashi omunhu ou lika tete keyoka oye ha kala e na oudiyo uhapu mokufafanifa naau a lika wlaxuuninwa,” Shaanika ta hokolola.
“Eshi twa mona kutya Onesmus olutu laye ola tameka okuninga tali ningi lilaula otwe mu pa a nwe omahooli ndele hatu mu vaveke omahooli kolutu laye alishe.”
Shaanika okwa ti nakufya okwe va lombwela opo va tameke okwiimba omaimbilo nokuninga eilikano eshi ve li mondjila.
“Eshi twa fika pokangelo Onaanda, Onesmus okwa xulifa nale mboli shaashi ovapangi eshi ve mu kwata ova mona kutya omukulupe okwa fya nale,” Shaanika ta hokolola.
Onghee okudja opo ovapangi ova tameka okukwafela omukulupe mukwao ou naye a lika keyoka komhadi eshi va tameka oku mu venda noku mu pa omiti.
“Konima yefimbo omukulupe okwa tuminwa koshipangelo shaShikuku shaashi ovapangi ova mona kutya omukulupe oku li monghalo ii neenghono,” Shaanika ta hokolola.
Ovakwapata vaOnesmus ova shivifila efyo laye omanga omukulupe mukwao otaku hokololwa e li monghalo ii moshipangelo shaShikuku.
Ovakulupe aveshe ova dile komukunda Onakapya moshitukulwa shaShana.