ONGALI – “Kakwa li nda tegelela nakufekelelwa edhipago lyameme a kale mekwatathano lyopahole nameme, oshoka okonyala makula gandje.’’
Ndhoka odha popiwa kuAntonio Fernando (27), omwana gwanakusa Jacobina Shivule a tseyika nawa nedhina Selma Shefi gwomimvo 47 ngoka a dhipagwa kukuume ke koomiihole gwomimvo 29 gwedhina David Nghiimbwasha.
Shivule ngoka a yambukile momukunda Ongali moshitopolwa shaShana, anuwa okwa tseyika ongomunangeshefa omunene, nuunene okwa shiwika nawa mondoolopa yOshikango.
Fernando okwa ti nakufekelwa okwa shiwikila iilonga yuufuthi, nokwa kala a landula yina omolwa a hala okuholama ondjala.
“Meme oha longo oshimaliwa, ota vulu okulonga N$4 000 mesiku. Ondi na uumbangi wa gwana oshoka omulumentu ngoka okwa kala nokukutha ko iimaliwa yameme uuna a landitha,” ta popi ngaaka.
Ta gwedha po ta ti, yina oku na egumbo noondunda hadhi hiilwa kOshikango hoka ha zi.
Fernando okwa ti eso lyayina otali lulumike, oshoka oya kuthwa omukwathi gwawo, nokamwayinakadhona hoka ke li koshiputudhilo shopombanda, okwa nyenga oku ka tseyithila onkundana ndjika. Ta pula kutya olye ta kala te ya yambindhindha.
“Meme okwa li omunankondo, omunangeshefa ke hole ondjala ye iha kala omutumba, oku na okukala ta nyangandhala ethimbo alihe.”
Omumwayinagona gwanakusa Maria Nikodemus okwa hokolola kutya, esiku lyahugunina a li nanakusa Olyomakaya sho a li a dhengagulwa komulumentu ngoka natango.
“Oshiwike ihashi piti po aaholike mboka inaaya dhengathana.
Esiku ndyoka nda li naye okwa li ndi ithana aantu ye ya kuthe kumwe, ihe okwa li a dhengwa etata lyeso,” ta ti ngaaka.
Nikodemus okwa ti, Shivule okwa li e mu lombwele kutya itayi ko we kegumbo lye, otaya ka lala naye, ihe ota yi manga koshipangelo.
Ta ti, ke shi kutya okwa ninguluka ngiini, nani okwa ka ya kegumbo lye, nokoshipangelo inaya ko we.
“Onda lala ndi li momalimbililo nonda penduka tandi dhenge oongondhi, onda li nda yi mekwatathano nomumwameme gumwe ngoka oye kwa li a kutha onkatu a ye ko kegumbo lye, ihe sho ta ithana kapwa li ngoka ta yamukula,” ta hokolala ngaaka.
Nikodemus, okwa ti mumwayina ngoka okwa li a ka pula paashinda ngele oya mono Shivule, ihe inaye mu mona.
Anuwa oya zi ko ayehe, oshoka omweelo gwegumbo ihagu egulukile kondje, oya pititha okanano komimvo omishona ka egulule omweelo hoka ka yi sigo omondunda yanakusa.
Okanona hoka anuwa oka zi mo taka kugu, taka matuka, oshoka shoka ka mono kashi shi okutalika lwaali.
“Sho twayi meni otwa adha olutu luli metale lyombinzi, nombele yi 0li molutu, omanga oshipala sha nyanyagulwa nomushi gokutsa,” ta hokolola ngaaka.
Anna Kakunya omumwayina gwanakusa Shivule okwa ti onkundana oye mu uvitha nayi oshoka mumwayina okwa si eso lyi nyanyaleka.
“Uunona we awuhe utatu ongame nda kala nawo, otwa kala nokuyambidhidhathana namumwameme oshoka omunankondo shili,” ta popi ngaaka.
Omukulukadhi a hokanwa kuhe yanakufekelwa edhipago, Pashukeni Nuujoma okwa ti, omulumentu ngoka oye e mu tekula okuza poomvula ne, ihe ke shi omuntu nando.
“Ihandi kotha ngame, ngashiingeyi onda hala a mangwa ihe ina galuka we pamwe tandi kala nda manguluka,” omukulupe ta popi neyeme.
Ta ti, oya kala nokudhengagulwa megumbo komulumentu ngoka, iimuna ota dhipaga ashike ngaashi a hala.
Omukulupe okwa po pi kutya okwa kala e li muupyakadhi, nuuna a mono oshimaliwa shopenzela ohe shi pulwa koonkondo ye ta mbandamekwa.
“Otatu gandja omahekeleko kaakwanezimo yanakusa,” ta hekeleke.
Omukalimo gwomomukunda ngoka Ongali edhina lye inaa haala lyi tumbulwe okwa ti, nakusa nanakudhipaga oya kala ethimbo pamwe, noya kala haya zi pamwe megumbo lyanakusa.
“Okudhengathana okwa li iilonga yawo yakehe siku, eso pokati kawo olya kala lya igalala, nonando pokati kawo ito yi po,” ta popi ngaaka.
Ta ti, oya kala haya longo iikumithalonga ayehe, oya kala ye li mewi limwe lela.
Opolisi otayi indile oshigwana shi longele kumwe nayo opo ya vule okumanga omulumentu ngoka ta fekelelwa edhipago.
Omukonakoni gwiimbuluma moshitopolwa shaShana Frederick Ndjadila okwa ti oshiningwanima shoka osha holoka okupendukila Osoondaha, pethimbo inaali shiwika.
“Otaku hokololwa kutya oya li ya monika taya kondjo iikando ayihe iyali Olyomakaya puundingosho tau ithanwa Omakwanyama,” ta hokolola ngaaka.
Opolisi oya ti, onkundana oya ka tseyika Osoondaha sho omudhimba gwa adhika mondunda ye yokulala gu li mekungu lyombinzi.
Opolisi otayi tsikile okukonakona osheetithi shedhipago oshoka kape na natango uuyelele wothaathaa.
Omufekelwa ina monika natango na hugunina okwali a monika natango.