Auleria Wakudumo
Oshikoto – Elelo loshitukulwa shaShikoto ota li kalongifa eemiliona N$4.1, okupitila mOuministeli womayambulepo eedoolopa noitukulwa yokoushai opo li opo i longifwe mexumokomesho lomomikunda moshitukulwa shaShikoto momudo 2024/2025.
Moshimaliwa osho, eemiliona N$3.3 otadi ka longifwa oku tunga oudjuwo veli 180 moikandjohoololo aishe ili omulongo moshitukulwa. Omanga N$846 000 ei tai xupu po tai ka tulwa koshikondo shoku andjaneka omeva moshitukulwa.
Etungo loudjuo ovo, oli li shimwe shomoilalakanenwa yelelo oku nawapewaka onghalo youndjolowele momikunda nomoshitukulwa ashishe.
Omupopiliko welelo lOshikoto, Petrus Nehale okwa yelifa kutya oundjuo 180 tava tungilwa ovanhu ve li momhumbwe ngaashi ovakulupe, novanhu vena ounghundi.
Oikandjohoololo omulongo ei tai ka mona oundjuwo ongaashi Guinas, Nehale Lya Mpingana, Omuthiya, Eengodi, Okankolo, Omuntele, Onyaanya, Oniipa, Onayena nOlukonda. Ashike moikandjohoololo oyo ina mu kwatelwa oshikandjohoololo shaTsumeb.
Nehale okwa indila yoo ovakwashiwana ava ve na omafa opo va tunge oundjuo pomaumbo avo, ta ti okutunga okadjuwo ita ku pula oilongifo yeli kalekelwa, omunhu ota dulu okulongifa oiti ile oilongifo ikwao moku eta po okandjuwo.
Nehale okwa ti omanga pehe na omuku weenghono doku endifa omeva mominino wa wana oshoyo omhumbwe yominino domeva moshitopolwa, elelo loshitukulwa shaShikoto ota li ka longifa omutengenekwa mwaalu wexumo komesho lomikunda wokomudo 2024/2025, opo li tule omeva meendama odo da fewa nale moikandjohoololo ngaashi Guinas na Nehale Lya Mbingana. Keshe oshikandjohoololo ota shi ka pewa vati N$423 000 no proyeka ei ota i ka tulwa moilonga momukokomoko wodula ei.