By Mbatjiua Ngavirue OTJOMUISE Okuhina ohange orure kovature va Maheke ohunga no u hasemba, o kuhina oukohoke na wina o u hazendu mo ma handurisiro otjiveke tji tja zuko tja ririre otjina otji pyu. Ombuze yo kutja Okomiti ya Maheke yo Mahandurisiro ma i yarukire ouparanga no u papi omahandurisiro ya penduruire orunywaa motjina ihi. Ongoramambo yeraka rOtjimburu Oritjatau ndazuko yatjangere kutja Omutjangerepo Omukarerere wo Ministeri yOmahi nOmahandurisiro, Frans Tsheehama, wa nunisire kutja Okomiti yEhi Oyandjandunge Momatungururiro wEhi ya ningirire omayarukiriro inga. Otja ku Tsheehama omayarukiriro inga omena rokutja omyano Okomiti mbi yuingurisa okuurika ovahandurisiwa kambirivyo no tji vyasere oku pwisiwa. Ozomburo okuza morukondua indui mazetja ozondjemeno ohunga notjiungura tjo mahandurisiro mOrukondua rwa Maheke zeri mozondi mbari. Ondjemeno imwe itja imba mberi mekoro ropolotika novana vihako vyo kombanda mohoromende ombemunika ayo ombe pewa omahi. Ondjemeno yarwe ndjiheri etuka omaindjambo ngetja pekara omarandero no munwe wa tara mo mberoo yo rukondua yo mahandurisiro ndjiri mEpako. Omaindjambo inga yetja ovandu vesuta pupeta o N$10,000 kehi yotjitiha poo ozongombe, ohorongo nandarire omara kutja omaningiriro wawo ye hakahane novo verire vemwe mberi porutuu ra imba mbu mapeya ave handurisiwa. Ozomburo mazetja imba mbapanda okutjita nao ngavezembe kutja omaningiriro wavo tji mayekavaza Okomiti yOmahanduririso tjandje yeri otja tji ve yehitisa. Makuzu ovandu po mberoo yomahi vetanaura omaningiriro inga no kutanaura oviherengururwa vyo uuru wondjiukiro no tutuu tuo miriro vyo vinamwinyo tuzenga. Munao omaningiriro nandarire yovahongwa no vana ndjerera tjiyazu nokutanaurwa tji ma yekavaza Okomiti kakuna ovina mbisana ingo. Omaindjambo wo marandero mo mhahandurisiro katjina otjipe. Mo 2004 o Ministeri yOmahi yaronga nomasa otjiuru tjayo mo Tjomeva, Ndakola Imene, ohunga nomahaka wokurandua. Brave Tjizera ndinondi nguri okanepo kOkomiti yOmahandurisiro ya Maheke, watjere omaindjambo womarandero ka manyando nu yasere oku kongorerwa. Waraisire kutja omberoo yorukondua yo Ministeri yOmahi kaisere okusisa ovatjite vo maningiriro ko mahandurisiro notjiungura tjayo porwe okutuna no kutjita kutja omaningiriro yerire omasupi. Omberoo indji tjiyazu imbo yasere okuhinda omaningiriro inga no makamburiro wayo ousupi ko Komiti yOmahandurisiro kombunda yo ku yekondonona no ku yehungirira ndji ma i sisa ovaningire nganduu pu vetatu mekoti rofarama aihe. Okuzambo okomiti indji a i hindi omana inga kOtjirata Tjehi ko Tjomuise kourike watjo tjitjina o u semba wo kuurika ovaningire mbu ma ve handurisiwa. “Nandarire kutja otjikando otjitjavari ami okukara norupa motjiungura ihi ko u mune wandje tjitjitua po ruyara no tji na uyara,” Tjizera watjere. Ovature wina mavetja muna oruhwe ropolotika mo mahandurisiro mOrukondua rwa Maheke tjinga otjivaro tjaimba mbena ondjinda mo polotika nawina mberi popezu nawo ave handurisiwa mehi ewa. Muwo muna o Ministera yOkehi yOmahundju, Killus Nguvauva, ngu ma kongorerwa iyo Ngooneya yOrukondua Laura McLeod, na ngwari omunane womberoo yorukondua Punderius Tjihoreko navarwe. Varwe Orata yOkarukondua kOmatoororero ka Pukiro, Brave Tjizera, Omutjangerepo Omukarerere wo Ministeri yOmahongero, Vitalus Ankama nawina otjihimise otjiuru tjomberoo yOmahi yorukondua, Erastus Nghishoono. Posyo Nghishoono wa patanene kutja omukazendu we wa handurisiwa natja ongurameno yo Ministeri ovakupasane okuhandurisiwa pamwe poruveze runwe. Wa patanene wina kutja oruveze pa handurisiwa we yazemisa komututa omuvapa. Komurungu wapandere okuhungirira kovina vyo kotjiveta nayandja ondunge komutjange ingwi kutja tjena omapuriro ngavaze kOmutjangerepo Omukarerere wo Ministeri mOtjomuise. Posyo ozongondjero azehe oku hakaena na Tsheehama oure wo mayuva yevari kanaa zatonene. Karure ombura ndjazuko Otjirata tjOrukondua rwa Erongo rwa yarura ozofarama nda yandjwa kovandu uriri nu makuzu a tji zeyandja komuna tjihako morupa rondjururiro no rata yorukondua. Munao o u hazendu wo kunanena vopolotika komurungu mo mahandurisiro otjeheri otjina tja Maheke uriri nandarire kutja mOmaheke oku tjimunikwa ayo tjitjitua pondjerera nu no kuhina ohoni poo ondira.