OUTAPI – Maria Shiponeni ou e li Namunganga kolufuko okwa yelifa ta ti oukadona inava kufa ombinga molufuko nelalakano lokukonga ovalumenhu.
Shiponeni edi okwe di popya onghela pefimbo lefiko loukadona ovo va kufa ombinga moshivilo shOlufuko kOutapi.
Neudo oukadona ve dulife po80 ove lishangifa opo va kufe ombinga moshivilo osho sha tameka oshivike shad ja ko.
Shiponeni okwa ti ovafuko inava endela okukonga ovalumenhu, ashike ove uya okupewa ehongo kombinga yefimano lomufyuululwakalo. Okwa yelifa ta ti ovakufimbinga ounona voukadona ovo tava shuna kofikola konima ngeenge va fukala, shaashi ofikola oya fimana. Shiponeni okwa indila oshiwana opo shi xulife po okutandaveleka oipupulu kutya oukadona ovo hava kufa ombinga ohava ka pewa ovalumenhu.
Okwa patulula ta ti olufuko kali shi oshinima shoupaani ashike otashi kaleka po efimano lomufyuululwakalo.
Shiponeni edi okwe di popya eli kwatela komapopyo kutya oukadona otava ningifwa oinima youpaani kolufuko. Ta ti olufuko ofikola tai yandje eetundi koukadona nghene vena oku li humbata fiyo va ninga ovakulukadi.
“Olufuko ola etela ounona vetu voukadona ouwa molwaashi ounona vahapu hava ve li kwata nawa konima yokufukala,” ta ti.
Shiponeni okwa ti oilonga yaye ongaNamunganga okutala ngeenge oukadona ove na omateelelo.
“Ame nda tema omundilo tete meumbo lolufuko omu. Omundilo owa fimana molwaashi otau eta po elandulafano pefimbo loshivilo sholufuko,” ta ti.
Omukalelipo welelo laMbalantu Nghishiyalelwa Hifinduako okwa ti olufuko ola fimana moshitunda shaMbalantu. “ Olufuko otali twikile okuningwa omudo keshe. Ovadali nava ete ounona vavo kolufuko opo va pewe ehongo kombinga yonghalafano,” ta ti. Okwa ti olufuko otali kelele oukadona vaha ninge omateelelo noshoyo va kale ovaduliki.
Albertina Shikongo weedula 20 noku li ta fukala okwa ti okuudite ehafo linene eshi a mona omhito yokufukala. “Omufyuululwakalo owa fimana shaashi otau tu longo tu kalekepo olufuko. Paife ohandi ke lihonga shihapu kolufuko,” ta ti.
Olufuko olo tali kwatele mo yoo omalandifo nomaulikilo opaipindi otali ka xula momafiku 2 Juli.
-fhamalwa@nepc.com.na