Oukadona ve dulife 20 ove lishangifa oku ka kufa ombinga moshivilo shokufukika osho hashi endele pamwe nomaulikilo oipindi Olufuko taa ka kala ko ketameko lomwedi tau ya.
Olufuko oshitufi shomaulikilo opaipindi omo ounona voukadona hava fukala mefundula leengoma.
Moshipopiwa shaye Omukokolipresidente Sam Nujoma, okwa ti Olufuko ola fimana molwaashi otali hongo oshiwana kombinga yomufyuululwakalo wOshiwambo.
Nujoma okwa ti elalakano lOlufuko okukaleka po efimano lomufyuulukalo ongheee okwa ti osha fimana ngeenge ovanhu ve shi omifyuulukalo davo.
Okwa ti oshiwana shihe na omufyuululwakalo osha fa ashike omuti uhe na omidi.
“Eengeleka nadi xulife po okukelela oshiwana ngeenge tashi landula omilandu domifyuululwakalo davo molwaashi Namibia oku na ekotamhango a yandje oufemba komunhu keshe a kale a manguluka,” Nujoma ta ti.
Moshipopiwa shaye ngoloneya woshitukulwa shaMusati, Erginus Endjala okwa kumaida oshiwana opo shi xulife po okutandaveleka omipopyo doipupulu kutya Olufuko ola nyika oupaani.
“Ovanhu vamwe otava ti Olufuko efundula loupaani omanga vamwe otava ti ounona voukadona otava kongelwa ovalumenhu kOlufuko. Onghee eshi oipupulu tai popiwa shaashi Olufuko kali shi efundula ndele elalakano okukaleka po efimano lomufyuululwakalo,” Endjala ta ti. Onghee okwa kumaida oshiwana opo shi xulife po okulandula omipopyo doipupulu molwaashi otashi kala shi pukifwe.
Olufuko ola ninga eedula nhatu inali kufa ombinga molwonghalo yombuto yoCovid-19 oyo kwa li ya tukuka mounyuni. Oshimaliwa shi dulife N$200 000 osha ongelwa kouvalelo wowina wOlufuko wa li ko mexuliloshivike kOutapi. fhamalwa@nepc.com.na