Jazema Hangero wa Hevita
Omuhohize wombazu nonongo movyombazu yOuherero nOumbanderu, Dave Veziruapi Rukero, matja oukura omaworonganeno wapamwe wovanatje ovazandu mba sukara mombura imwe.
Ovanatje vetu ovazandu tji ve kuru va rire ovanene aave kara mokuhandjuka, nokuhambana otjotutu tu tu nomasa, kutja omunene, omuṱikona morutu aave i kotjivetero kutja ve tengasane, ave rire omakura. No kuhino ume wawo omunene, omuṱiṱi, omuremane notjingundi. “Amuhe mwa rire omakura mwa sukarere tjimwe, mwa ziza ombinḓu meyuva rimwe poo pokanguma kemwe.’
Oukura ounanḓengu motjiwaṋa orondu u tunduuza onḓarasaneno, ondengasaneno, epango, okuvaterasana motukupo, ozonḓiro na mehupo kokutja omukwao a ha rire omuhepe poo omuhangauke, a hamunika peke, nungwari ma munike otjovakwao. Oukura oviṋa vyokunambekasana, okupasana orusuvero tjinene okuyamasana moviṱo ovingi pekepeke vyehupo.”
Otjiṋa atjihe tji nouwa novui, ouvi woukura okutukanasana, okuyambasana, okuhinokuvarasana, okunyekererasana, okunyanda omanyando nge he ri wo nokuisanasana omana tjimuna: Kamujendu, Kauhaha, Njoko. Tji ma ku za Njoko pe heya kutja oukura u tengerwa komukazendu, nu pe nembo rOtjiherero ndi tja: “Kaina umwe, kaiho ovengi.” Otjiṋa tjarwe ongendo otjikariha nomakaya moukura. Omakura kaye sokunwa ovipurukise nu kaye sokupangura, poo okutoora omukazendu okuyarura tjarwe omambo omavi motjinyo nomatuka.
“Oukura wetu u yenda amau yepe nokutoora ondjira yarwe. Ovandu ve nyanda oukura otja pondondo yehupo nu kororowa kaape ungura nao. Ekura ndi noviṋa (ovimariva) ondi tengwa okukapita imba mbe hi notjiṋa (ovasyona). Ozombwe ze nyengurwa nokunyengwa rumwe aze rambwa moviwondo. Rukuru, omundu ingwi otjingundi, omusyona poo otjirema ongwa rire omuhona wotjiwondo, mena rokutja e he rimunu okuhumbwa poo okumunikwa oukehi.”
Ma pata ama yandja omazengururiro kouzeu mbu munikwa moukura wanambano ”tu ṱize onḓengu nomaunguriro omawa moukura tu sokuworonganisa omakura poo oviwondo avihe atu hongo omaunguriro noveta youkura.”