Omukulunhu woshikondo shokukonakona oimbuluma moshitukulwa shaHangwena, omupedukomufala Zachriah Amakali okwa kumaida oshiwana opo shi kwate nawa eendjebo, unene tuu mokati kovanhu.
Okwa ti omunhu keshe ou ta ka hangika e kwete ondjebo nouhasha ota ka pewa ehandukilo lopaveta ile a kufwe ondjebo yaye.
Onghee okwa ti oulumenhu itau ti kutya okukala nondjebo i li kombada mokati kovanhu unene tuu peendingosho. Okwa ti opolifi oya didilika ovanhu vamwe hava kala mokati kovanhu va humbata eendjebo di li kombada.
Amakali okwa popya e likwatelela kombinga yoshikumungu shomulumenhu weedula 36 a yashwa papuko nondjebo mokuulu kukaume kaye pefimbo kwa li ve li motuwa.
Oshiningwanima osha ningwa Omaandaxa komukunda Ondingwanime moshitukulwa shaHangwena efimbo lokomatango.
Opolifi oya hokolola tai ti mwene wondjebo okwa li a homata ondjebo moshiya ya lukilwa ku na oshikuti oyo kwa li ya taalela kukaume kaye.
Okudja opo oshikuti osha nuka ko kondjebo nokuyasha kaume kaye.
Nakuninga oshihakanwa okwa twalwa koshipangelo shEenhana opo a ka mone epango lopaunamiti. Okwa lekelwa mo moshipangelo noku li monghalo i li xwepo nomakonakono opolifi otaa twikile kombinga yoshikumungu eshi.
“Ovakulunhu momaumbo nava kwate nawa eendjebo davo opo diha monike kounona molwaashi osha nyika oshiponga ngeenge ondjebo ya monika kounona,” Amakali ta ti.
fhamalwa@nepc.com.na