Okamatyona keedula 17 oke lituwa ke li meemhango kuina ka xulifa koshi yomuti.
Oshiningwanima osha ningwa mexuliloshivike molukanda Hakahana kOmaruru efimbo leevili dongula.
Nakufya okwa tongololwa oye Alex Nghitila Naruseb omukalimo womodoolopa Omaruru.
Omupopiliko wopolifi moshitikulwa Erongo, Inspekta Ileni Shapumba okwa holola ta ti okamatyona oka lombwelwa kuina opo ka ka koshe mo oiyaxa nokukala meumbo shaashi okwa li kwa toka.
Okudja opo Naruseb okwa tameka okuhanduka nokuya pondje yeumbo.
Opolifi oya hokolola tai ti efiku olo ina yokaana okwa teleka ashike ina hala okukalya ouvalelo.
Otaku hokololwa kutya ina yaNaruseb okwa penduka ongula ta ka teka omeva lwopotundi 07h00.
Nokudja opo Naruseb okwe lituwa kuina a xulifa e li meemhango.
Omwedi ou, moshitukulwa shaHangwena komukunda Otunganga okwa lopotwa okamatyona keedula 13 ke lituwa kuxe ke li meemhango ka xulifa koshi yomuti mepya konima eshi ka tanguninwa kuxe kutya oka kufa mo oWhatsApp mongodi yaxe.
Omwedi wa dja ko, koWindhoek nako okwa lopotwa okamatyona keedula 13 ke lituwa kuxe ke li meemhango ka xulifa molwaashi vati ka tanguninwa konima eshi kwa li ta ka tala ouvidio va nyika oupaani.
Ovadali paife ova kwatwa koumbada wokupopya nounona vavo ngeenge tava ningi omapuko shaashi okwa didilikwa ounona voumatyona hava kwatwa keemhepo ddoulimangeleka konima ngeenge va tanguninwa.
Oshiningwanima shitilifa, omulumenhu weedula 42 ou vati a ninga omafiku ta kongwa shaashi a kana nokwa li e li pokuhombola vati okwe limangeleka.
Matheus Leevi Ilongeni okwe limangelekela keumbo lavo komukunda Onekuku moshitukulwa shaMusati oshivike sha dja ko.
Iilongeni ina fiya po omukanda tau yandje ouyelele kombinga yefyo laye.
Oshingwanima shikwao, omulumenhu weedula 44 okwe lituwa e li meenhango a xulifa komukainhu waye koHenties Bay mexuliloshivike.
Otaku hokololwa kutya omulumenhu ou okwa li ve li meumbo nomukulukadi waye nokudja opo nekulu laye okwa ka nangala a fiya omushamane waye mokombifa.
Opolifi oya hokolola tai ti konima yefimbo omukainhu oo okwa penduka opo a ka tale kutya omushamane waye oku li peni molwaashi okwa li a limbililwa.
Omukainhu ou eshi a ya mokombifa okwa hanga omushamane e li meemhango a xulifa.
Nakufya ina fiya po omukanda tau yandje ouyelele kombinga yefyo laye.
Omakonakono opolifi otaa twikile moikumungu aishe yomalimangeleko.