Oumatyona vavali veedula 17 ova kwatwa po Etine eshi vati va teya ofitola hai landifa eengodi dopeke molukanda Mondesa moSwakopmund.
Ovafekelwa vati mofitola ova vaka mo eengodi dopeke dongushu N$1500 mwa kwatelwa noilongifo yeengodi.
Omupolifi wopolifi moshitukulwa Erongo Inspector Ileni Shapumba okwa hokolola ta ti ovafekelwa otava holoka momhangu yaSwakopmund notava pangulilwa oshibofa shoumbudi.
Oinima aishe ya vakwa mofitola oya monika eshi ya hangika kovafekelwa noya shunifwa kumwene wofitola nale.
Shapumba okwa ti opolifi oya didilika oumatyona ve li koshi yeedula 20 hava kala tava teya eengeshefa dovanhu omanga vamwe ohava kala tava nyeke ovanhu oinima yavo momapandaanda.
Okwa yelifa ta ti etewo lomaumbo neengeshefa ola londa pombada modoolopa yaSwakop naWalvis Bay eshi oumatyona paife ve li yanena momapandaanda tava vake.
“Otwa didilikwa oumatyona vahapu hava i keefikola hava kala va ninga oungudu wokunyeka ovanhu omaliko avo oufiku ngeenge tava di koilonga,” Shapumba ta ti.
Okwa ti oumatyona vamwe ove hole okukala peendingosho va tela ovanhu ngeenge va kolwa opo va nyeke ko oinima yavo.
Okwa kunghilila ovadali opo va kale tava popi nomaludalo avo momaumbo vaha vake vali oinima yovanhu shaashi oshiponga ngeenge okaana ta ka vake eshi ovanhu vamwe ohava kala ve na oilwifo.
“Oumatyona tava ka lopotwa va vaka oinima yovanhu ile va nyeke ovanhu omaliko avo navo ove na ashike okukwatwa po,” Shapumba ta ti.