Okudja muJanuali fiyo oshivike eshi, moshitukulwa shaShikoto omwa lopotwa oibofa youmbudi woimuna ili 246 noyomahepekafano omomaumbo oi li 46.
Edi oda popiwa kungoloneya moshitukulwa shaShikoto Penda Ya Ndakolo pefimbo kwa li ta yandje omushangwahokololo koshiwana kombinga yonghalo yoshitukulwa yomo2023.
Omudo keshe oongoloneya voitukulwa ohava yandje eelopota moshiwana kombinga yeepoloyeke da longwa noshoyo omashongo aa va aalela moitukulwa yavo.
Ya Ndakolo okwa ti oimbuluma oya londa unene pombada moshitukulwa noibofa yomakwatonghonga otai ende ya auka pombada efiku keshe mOshikoto.
Okwa weda po ta ti ounona novakulupe ovo unene va ninga oihakanwa yokukwatwa onghonga kovapambelele vavo.
“Ovakalimo mOshikoto ova taalela eshongo lokuhe na oitaashi yopolifi unene tuu komikunda, onghee naashi oha shi eta oimbuluma i lopotwe kwa lata,” Ya Ndakolo ta ti.
Okwa yelifa ta ti unene tuu oibofa yomakwatonghonga ohai lopotwa kwa lata molwashi oshiwana oha shi kala shi li kokule noitaashi yopolifi.
“Ovanhu ohava ende eendjiladiledile tava ka konga omayakulo opolifi,” ta ti.
Okwa weda po ta ti osha fimana ngeenge ounona tava pewa ehongo kombinga yonghalafano yoku ya momilele opo va kale ve na eudeko nowino yoku li a mena ngeenge tava i momilele.
fhamalwa@nepc.com.na