Festus Hamalwa
Oumbudi wokunyeka ovanhu omaliko avo otau ende wa uka pombada efiku keshe eshi oshiwana hashi ponokelwa kookalyamupombo nokunyekwa omaliko avo.
Moshivike omu okwa lopotwa oibofa ine yovanhu va kanifa omaliko avo konima eshi va ponokelwa kookalyamupombo. Omukainhu weedula 43 okwa ponokelwa kookalyamupombo vatatu pefimbo kwa li ta di kombaanga a ka nana oshimaliwa.
Oshimaliwa sha nyekwa oshi fike poN$4 500, ouboba vombaanga noshoyo ongodi yaye yopeke Oshiningwanima eshi osha ningilwa mOngwediva pofikola Liberty Heritage Private School moshanga shomutenya lwopotundi 14h30 Etitatu.
Nakuninga oshihakanwa omuhongifikola pofikola opo a nyekelwa oshimaliwa shaye. Omupopiliko wopolifi moshitukulwa shaShana Inspector Thomas Aiyambo okwa hokolola ta ti nakuninga oshihakanwa okwa li a ka nana oshimaliwa pombaanga yo-FNB pOshana Mall.
Vati mboli manga tadi kombaanga ovafekelwa ova kala tave mu lifa kutya okwa uka peni. Opolifi oya hokolola tai ti eshi nakuninga oshihakanwa a londa motuwa yaye okwa uka keumbo mOngwediva vovafekelwa ove mu landula fiyo okeumbo laye.
Eshi a fika peumbo laye okwa twala oinima meumbo oyo kwa li a landa okudja opo okwa fiya po otuwa yaye ndele ta ende keemhadi fiyo opofikola opo a longele.
Opolifi oya ti eshi ta ende ovafekelwa ova landula natango omukainhu oo tava shingi otuwa itoka yonomola yaEenhana ashike omukainhu okwa kala a limbililwa kotuwa ye mu landula okudja kombaanga.
Vati eshi omukainhu ta hale okufika poshivelo shofikola okwa nukilwa kookalyamupombo ve kwete eembele ndele tave mu denge nokumuningila omatilifo kutya otave mu dipaa ngeenge ina hala okuyandja oshimaliwa.
Omufekelwa umwe okwa teta ondjato yomukainhu oyo ndele tava faduka po nayo va uka motuwa yavo.
Kape na omaliko a monika shaashi kape na ouyelele kombinga yavafekelwa onghee omakonakono opolifi otaa twikile.
Omukainhu weedula 35 naye okwa nyekwa omaliko aye konima eshi a ponokelwa kookalyamupombo eshi kwa li a hangika ta i koilonga efimbo longula. Oshiningwanima eshi osha ningilwa molukanda moSoweto moWindhoek Etitatu.
Opolifi oya hokolola tai ti nakuninga oshihakanwa okwa nyekwa olaptop, ongodi yopeke noshoyo ondjato yaye omo kwa li mu na oshimaliwa. Kape na ovafekelwa va kwatwa po onghee omakonakono opolifi otaa twikile.
Opolifi oya kunghilila oshiwana opo shi kale sha kotoka ngeenge tashi ka nana oimaliwa keembanga shaashi ookalyamupombo ove lininga ve hole okulifa ovanhu ngeenge ve li keembaanga.