Abraham Mwanyekange
Ovakalimo vomomukunda Omupini moshikandjohoololo Okongo moshitukulwa Ohangwena ova ti ova lulilwa koumbudi weengobe we liteyela momukanda wavo.
Umwe womovanamukunda, Theo Shimulu okwa ti momudo ou okwa kanifila mo nale eenghwandabi di li nhee moule ashike womwedi netata.
“Eengobe mbali oda kana muJanuali, omanga dikwao da vakwa po oshivike sha dja ko,” Shimulu ta holola ngaho.
Shimuli okwa holola kutya ngeenge tava ningi omakonakono kutya eengobe oda kana ko nghahelipi koshiunda ohava mono ashike omilyatelo deengobe neemhadi daavo ve di shinga ko. Okwa twikila ta ti fiyo okeluwa eli kape na nande oimwe yomwaado da vakwa po ya monika.
Ovakalimo vomomukunda Omupini ova holola kutya kave uditile ombili evako loimuna olo la lundalala molwaasho otashi va kanifile ombili yokomwenyo.
“Ongobe oi na ondilo neenghono adishe nongeenge we i kanifa iho kofa nawa,” ta ti ngaho.
Shimulu okwa pula koovene vomikunda odo dili popepi nOmupini ngaashi Onehanga nOshalumbu va ninge oshoongalele shopamuhanga opo va tale kutya otava lwifa ngahelipi oumbudi woimuna pamwe novanamikunda vavo.
Oumbudi weengobe moshikandjohoololo shaKongo otau londo efiku nefiku, muJanuali neudo ombelewa youministili womauyele nomakwatafano mOhangwena okwa li ya lopota kwa monika eengobe da koya puheyali da monika nokupewa oovene konima eshi kwa li da vakwa komukunda Ondema osho yo Okongo moshikandjohoololo shaKongo. Hamushanga welelo laUkwanyama moshikandjohoololo shaKongo Josia Pashita pefimbo kwa li aya meenghundafana nombelewa yomauyele okwa ti naye oumwe womwaavo kwali va vakelwa eengobe davo.
“Ohandi pandula opolifi ya Namibia molwaashi oya longa noudinini okumona eengobe detu, ngaashi dange odakanene mo2024,” hamushanga ta holola ngaho.
Okwa weda ko ta ti eengobe oda hangika keenhele domalandifilo eengobe komukunda Onainghundudu mOhangwena.
“Ohandi indile oshiwana shi pashuke opo shiha lande eengobe kombiliha. lipula nee ongobe to i lande ashike koN$3 000 ?” ta pula ngaho.
Pashita okwa londwela oshiwana opo shi tale nawa eembapila doilandifomwa molwaashi vati efimbo limwe kadi na ouyelele u li mondjila.
Omukulunhu womakonakono woimbuluma kOhangwena komufala wopedu Melanie Mburu efimbo a kwatafanwa naye kuKundana ka li e li mombelewa e tu pe omivalu nongushu deengobe da vakwa mOhangwena odula ya dja ko. -abbenghilai@gmail.com