Auleria Wakudumo
Ouministeli woikwameni neameno lokeengaba owa pitifa eemhito doilonga dovanailonga ovo tava longele koshikondo shodolongo di li 400.
Omaindilo okwa hovela nale okutameka momafiku 05 Desemba 2025 notaa ka xula momafiku 05 Januali 2026. Oshiwana otashi indilwa opo shi tule mo omaindilo asho osheshi la enda ongula olo la toola oshima.
Eshi osha hala okutya, ouministeli otau kongo ovamati noukadona okudja peedula 19 fiyo 35 ve li 400 ovo tava ka pewa eemhito doilongo edi.
Ovakongi voilonga nava kale Ovanamibia, ve na oitwa 25 moilongwa ihamano nosimboli yoE mOshiingilisa mondodo 12 ile mondodo 11.
Nava kale yo tava dulu okukufwa omanyala okuulika oumbangi kutya kave na oibofa yoimbuluma yasha ile va teelela epangulo. Omukongi woilonga na kale ehe na eetatu di wetike ngeenge va djala omudjalo woilonga. E na oukolele, ehe na oudu wopamadilaadilo ile wokolutu oo tau dulu okuya moshipala oilonga yaye. Nakale ena ehalo lokuya kundokotola a ka ningilwe omapekaapeko, taa dulu okushanga okatutsa oshoyo okuninga omadewo. Nakale e lilongekida okutuminwa keembinga adishe doshilongo.
Ava vali moilonga ya faafana nale, navo otava dulu okuninga eindilo op ova shune mo moilonga natango. Nava kale vena eedula inadi konda po 45 novena oumbangi tau holola kutya ovali va ninga omadewo oilonga nale, vehena eetatu tadi ulike. Oipumbiwa ya wedwa po oya faafana naayo yaavo opo tava kutwa lwotete.
Ovo tave ke shi pondola otava ka tumwa komadewo oilonga oule weemwedi omuwoi koLucius S Mahoto Correctional Service Training College mOmaruru.
Ovakongi voilonga nava longife eefoloma depangelo okukonga oilonga. Nava kwatele ko eecv davo keembapila depangelo, eendjapo oshoyo oumutwe voshilongo noipumbiwa aishe ndele tava ka umba eembapila davo popepi neembelewa dodolongo dili popepi navo.