Ouministeli woikwameni neameno lokeengamba owe li pyakidila nokuyandja omadeulo kovanambelewa vawo nghene ve na okuyandja omayakulo mawa koshiwana.
Omupopiliko wouministeli woikwameni Margaret Kalo okwa ti ouministeli owa tameka noku yandja omadeulo oshivike sha dja ko notaa ka xula momafiku 7 Juli 2023.
Kalo okwa yelifa ta ti elalakano lomadeulo opo ovanailonga vomouministeli wavo va kale tava ya kula nawa oshiwana unene tuu ovanambelewa hava longo keembelewa nokuyandja omaufemba novanambelewa vokeengamba.
“Otwa didilika oshiwana sha kala nokunyenyeta kombinga yovanambelewa itava ya kula nawa oshiwana, onghee naashi osha eta opo tu kale twa yandje omadeulo owina,” Kalo ta ti. Okwa weda ta ti otava lalakanene opo ounimisteli wavo u yandje yoo vali oshihopaenenwa keeministeli da yooloka kombinga yoku yandja omayakulo mawa koshiwana. “Osha fimana ngeenge oshiwana tashi ya kulwa nawa opo shi kale shina ekwatafano liwa novanailonga. Elalakano leembelewa doikwameni koitukulwa ya yooloka okuyandja omayakulo moshiwana noshoyo okukale po ekwatafano liwa,” Kalo a weda po.
Omadeulo otaa pewa ovanambelwa tava longele keenhele ngaashi Otjiwarongo, Swakopmund, Walvis Bay, Rundu, Omuthiya, Ondangwa, Oshakati, Eenhana, Outapi, Opuwo, Wakashamane, Oshikango, Hosea Kutako Airport, Gobabis, Trans-Kalahari, Orandjemund, Luderitz, Noordoewer, Karasberg, noKeetmanshoop. fhamlwa@nepc.com.na