Taimi Haihambo
IIYALE – Omupopiliko womukunda Iiyale moshikandjohoololo shaShikuku , moshitukulwa shaMusati Timoteus Kalimba okwa ti ouminusteli womidingonoko, oixwa nomapashiono ou na opoloyeka yokuwapaleka omalambo oo a fiwa a ekama komahangano oo haa pewa eekondalaka dokuteka edu lokutunga eepate.
“Eshi osha li shi na oku ningwa ngeno nale, ashike eshi ovanambelewa vokouministeli ve ya okufufila ova ya petale la puka li li pongeleka yaElim,” ta ti.
Kalimba eshi okwe shi yelufa konima ovakalimo vomukunda va yandja ekemo lavo kuKundana nghee ovapewi veekondalaka dokufula omadu okutunga eepate, hava fe ashike omalambo moshitukulwa nokwaafiya a mbwalangadja ngaho.
Mwene womukunda Jason Shilongo okwa ti omadu aa haa longifwa okutunga eepate ihaa hangika ashike keshe pamwe.
“Okwa li ndi wete lela twa ninga ovanelao eshi onhele imwe yomomukunda wange oyo ya hoololwa i kale yedu lokumina omadu okutunga eepate. Paife eshi hashi nyematifa nge paife ngaha osheshi onhele ya fiwa ashike i na omalambo inaa fufilwa nosha nyikila ovanhu noimuna oshiponga shaashi paife okwa ninga ahapu,” ta ti.
Shilongo okwa ti eepate dihapu dakula moshitukulwa shaMusati ongaashi opate inene yaShakati – Okahao, Okalongo osho yo Oshikuku-Elim, oda tungifwa edu la dja momalambo oo.
Omahangano akwao natango akula unene koshitkulwa shanooli vati nao oko ha e ya okuteka edu nomaloli akula.
“Paife okondalaka yokuteka edu eshi ya pwa ko, inatu ya vali tu ke i patulule shaashi ovatuti vomadu ovanyona onhele yetu neenghono,” ta ti.
Shikongo okwa ti ova kendabala omalambo amwe oo a ninga omatale paife ve a tule ashike omeva okunwa oimuna yavo, nokukwafela ovanhu vomomukunda nokomikunda dopopepi, ashike osho kasha na eshi sha kwafa shaashi akwao onghee ngaho taa ende ta akulu oo tama ningi male.
“Melambo limwe ngeenge omwa wile nande oshimuna oshili ohashi dimo noudjuu ile shikale ashike ina shidjamo lela. Omalambo amwe natango omatilifa ngaashi kounona,” ta ti.
Kalimba okwa ti omakemo ovakwashiwana okwe va uda, noumisteli ou li metifa loku shi longa mo.
–Taimihaihambo2000@gmail.com