Auleria Wakudumo

Minista wouhaku nonghalonawa Esperance Luvindao okwa shivifila Ovanamibia kutya ouministeli otau ka kuta ovanailonga ve fike po 2 000 omo eemhito 1 713 tadi ka pewa ovanailonga vomoipangelo no 337 otadi ka pewa ovanailonga vomeembelewa mouministeli. 

Minista okwa ti eshi osha pondolwa eshi epangelo le va wedela ko eemiliona N$185. Moshimaliwa omu, ouministeli owa kufa mo eemiliona N$179,5 okukuta ovanailonga. 

“Itatu yandje ashike oilonga, ndele ohatu kwashilipaleke yo kutya ovanailonga ova tulwa peenhele opo pe na eemhumbwe,” Minista ta ti ngaho. 

Oshipangelo shaKatutura otashi ka mona ovanailonga ve fike po184 kongushu yoshimaliwa N$14.5, mwa kwatelwa ovapangi ve fike po17 (enrolled nurses) novapangi 48 (registered nurses). 

Oshipangelo shoWindhoek Central otashi ka mona eemhito doilonga di li 98, mwa kwatelwa ovanambelewa vouhaku ve li 17. Ombelewa youhaku moshitukulwa shaKhomas otai ka mona eemhito doilonga 88 okukwafela nouhaku wopedu hano oprimary care moikandjohoololo. 

Nonande itandi ka dula okupopya oitukulwa aishe kooshimwe nooshimwe, onda hala okutofa mo imwe ngaashi oshitukulwa sha// Kharas osho tashi ka mona eemhito doilonga di fike po 57 (ovapangi) omanga oshitukulwa shErongo tashi ka mona eemhito doilonga di fike po 85 (ovapangi). 

Oshipangelo shaNandjokwe otashi ka mona 45, Oshakati otashi ka mona eemhito doilonga dili omuwoi omo ouministeli tau ka kuta eendokotola odo deli longela sha. 

Minista okwa ti ouministeli owa kwafela yoo pamukalo woshimaliwa eemhito doilonga moshitukulwa shaTjozondjupa dili 116, Omaheke 81, Ohangwena, Zambezi 89 noitukulwa ivali yaKavango 66. 

Eshi otashi holola kutya epangelo ola tula ouhaku wOvanamibia aveshe mokukwashilipaleka eandjo loilonga nokuhapupalifa omwaalu wovanailonga vouhaku ngee ovapangi, eendokotola, i l e ovanambe l ewa vouhaku va wedwa po. “Pehovelo lomudo eshi omutengenekwamwaalu woneudo wa pita, otwa mona kutya otuna omhumbwe yovanailonga ve fike po 2 035 moipangelo. Ovanailonga ava ovali tava pula epangelo eemiliona N$8. Molwa oinakuwanifwa imwe, oshimaliwa eshi sha yandjwa kepangelo ka shali tashi wanene eemhumbwe adishe ngaashi okulanda omiti oshoyo okukuta ovanailonga poshikando,” Minista ta fatulula ngaho. 

Okwa ti nande ongaho, ina shuna omutwe moipeta nokwa kala ta konghola kelimba lepangelo fiyo osheshi a yeululwa. 

Luvindao okwa holola kutya ouministeli otau ka kwashilipaleka kutya eemhito doilonga edi oda yandjwa koshiwana meendelelo onghene ouministeli otau ka patulula omaindilo aa oule woivike ivali. 

“Ouministeli otau twikile okutula ouhaku wOvanamibia komesho. 

Ohandi dimine kutya oshilongo ka shili ponghatu youhaku opo sha hala okukala ashike nande ongaho, natango ka tuli ponghatu opo twali nale,” Minista ta ti ngaho.