Auleria Wakudumo
Kansela woshikandjohoololo shaKongo Efraim Shipindo okwa holola kutya ova nyumuna po eeproyeka dihapu dounamapya moshikandjohoololo shaye okudja mo2020 fiyo oneudo.
Shipindo okwa holola kutya eifano lomupresidente okuyambula po ounamapya oleva twa omukumo nomolwaasho veli tula mokunyumuna eeproyeka dihapu.
“Eeproyeka da shunwa kopate ongaashi oshuunda hashi ufanwa Ndevahoma, Onehanga, Olukula, Omauni, omatala aShalambe nadikwao da wedwa po,” Kansela ta holola.
Shipindo okwa holola kutya eeproyeka adishe otadi ende nawa. Okwa ti oshikandjohoololo shaKongo osho shimwe shomeenhele odo dina edu lina oushosho wa wana okuninga oikunino. Oshili yo shimwe shomoikandjohoololo oyo ina oimuna ihapu unene eenghandabi.
“Otwa yambula po oproyeka yoshuunda sheengobe pOndevahoma. Oproyeka ei ohai landifa eengobe dovakwashiwana keshe komwedi paife. Otwa ninga yo onghendabala yokweeta po oshiunda oshoyo oshivixa sheengobe opo ovakwashiwana hava landife vali eengobe pakutala nomesho. Monena, omalandifo oimuna mOndevahoma otaa ende nawa. Kansela ta ti.
Kansela okwa holola yo kutya ova nyumuna oproyeka Onehanga oyo hai longo omahangu. Oproyeka ei oya kala eedula ya fya noshiwana osha kala tashi keme oule weefimbo opo oproyeka i shune moilonga.
Eshi hatu popi nena, oproyeka ei oya dja eetona heyali doilya yomahangu neudo. Kansela okwa ti ova kuna yo oihape noingumutulo konima yomahangu moproyeka ei.
Oshikandjohoololo shaKongo osha nyumuna yo oproyeka hai ifanwa Olukula. Oproyeka ei ohai longo oihape noingumutulu oshoyo omai.
“Oproyeka yaMauni ohai landifa oihape, oingumutulu nomai kovakwashiwana kondado ili pedu. Oproyeka ei ohai landifa yo oikunomwa yayo nomai kovanaudu ovo tave ya pokapangelo kaMauni,” Shipindo ta fatulula.
Opena yo oproyeka yokunduluka oipundi, oitaafula noikwapundi aishe hai ifanwa Omauni. oproyeka ei oya ya mekwatafano nEenhana VTC opo ovahongwa vavo va kale have li deula okunduluka oipundi noitafula.
Oproyeka oyo tuu oyo ohai landifa yo oihape noingumutulu kombilixa kovakwashiwana.
Kansela okwa ti ovena yo eeproyeka dihapu inadi pwa okutunga natango. Eeproyeka edi ongaashi omatala Ashalambe oo ta kwafela okulanda oilongomwa yovakwashiwana kutya nee oxuxwa, oihape noingumutulu ile keshe osho omunhu ta landifa.
Omatala aa otaa ka landa kovakwashiwana nokulandifa kukeshe ou a hala okulanda.
Oshikandjohoololo osha teelela yo oproyeka youxwilili hano oproyeka yomushroom tai ka kala mOnehanga. Oproyeka ei oyili metifa loku pwa.
“Eenduda dovanailonga vomoproyeka oda pwa nale okutungwa nomalongekido opetameko okwa pwa nale,” Kansela ta kwashilipaleke.
Eeproyeka doikulya moshikandjohoololo shaKongo itadi kandula po ashike nakaidi kahalwenya ndele otadi yandja oilonga unene kovanyasha vomoshikandjohoololo.