Ounona vofikola 2025 vadja keefikola 92, novahongifikola vane mOshitukulwa shaHangwena ova monika omukifi wonghana.
Omukulunhuwiliki wehongo moshitukulwa shaHangwena Isak Hamatwi okwa koleka oshinima eshi she liteela moshitukulwa okudja oivike ivali ya pita.
Hamatwi ta ti eefikola edi di na omukifi ou woshipa odomoikandjolongo 10.
Okwa ti ofikola Omutaku Combined School oyo imwe ya didilikwa i na omwaalu muhapu wovanafikola va kwatwa konghana. Ovanafikola tava vele pofikola opo oveli 120, nove li meendodo adishe. Twaalulilwa Primary school oyo ina na oihapu wopokati oya lopota ovanafikola veli 109.
Kofikola Omutaku Combined School okwa monika ovalongi vatatu va kwatwa konghana omanga kOshaango combined school okwa monika omulongi umwe.
Edi Hamatwi okwa hokolola kutya ovanafikola vahapu otava mono oixuna konghana, vamwe nokulu ova ninga oipute vo otava kunyuwa.
Ta ti yoo ovanafikola vamwe ova monaepango lopaunamiti nova veluka.
“Otwa ninga onghendambala opo tu tume komaumbo ovanafikola ava va kwatwa konghana opo kukelelwe etandevelo lomukifi ou meefikola,” Hamatwi ta ti.
Okwa ti ngeenge omunafikola e na onghana iha dulu vali okulitula mo moinyangadalwa yaye yofikola shaashi oha kala ta nyu, ta ti vamwe ohava ningi oipute nomakaka koshipa.
“Otwa shivifila ombelewa yomukulunhuwiliki moshitukulwa shaHangwena opo i dule okuyandja omayakulo opauhaku meendelelo,” Hamatwi ta ti.
Hamatwi okwa ti ovanafikola ile ovanailonga ve na oshidu shanghana nava lopotwe pefimbo opo va tumwe komaumbo diva.
Okwa kunghulila ovadali opo va kale tava yambidida ounona vavo komaumbo nokukwashipaleka kutya ounona ova twalwa koipangelo.
Omukulunhuwiliki wouhaku moshitukulwa shaHangwena John Hango okwa ti ombelewa yaye otai ka yandja omayakulo opauhaku keefikola di na ovanafikola novalongi tava vele.
“Otwa ninga omutumba nale pamwe novanailonga voundjolowele opo tu kundafane nghee tuna okukala twa yambidida ovanafikola aveshe ve na onghana. Onghee ovanailonga vouhaku otava ka talela po eefikola odo,” Hango ta ti.
Hango okwa weda po ta ti onghana ohai etwa kekako onghee okwa kunghulila oshiwana opo shi kale tashi kosho oikumbafa noikutu noku li wapaleka komalutu.
“Natu fimanekeni oukoshoki efimbo keshe shaashi oukoshoki ohau dulu okukelela etandavelo lomikifi da yooloka,” Hango ta ti.