Ounona voumati vavali oshivike eshi ove lihanga konima yekumba molwa oibofa inene –shimwe oshedipao, shikwao oshokukala nepangwe nashimwe shoukongo uhe li paveta. Oumatyona ovo, kamwe okomido 14, nakakwao okomido 17, kamwe omido 19 novanyasha vavali ve na omido 21.
Ava ova kwatwa molwa oimbuluma ya yooloka ya ningwa koshotukulwa shaMaheke nErongo.
Oshibofa shaxuuninwa omomo Mangestalata Eden Iyambo a yandja epitikilo opo okamatyona komido 14, keli futile modolongo, molwa edipao lamukwao womido 18.
Otaku hokololwa okamatyona oko ka dipaa okamati Anton Goeieman (18), sha ningilwa kolukanda ledina Kanaan moGobabis. Otaku hokololwa Goeieman a landula noku pula okamatyona oko ta ti oka vaka po oshingangamwifi shaye shococaine neenghaku. Pefimbo loikolokosha, okamatyona oko paife ke li omufekelwa, vati oka kufa mo ombele, noku twa Goeieman mofingo.
Eshi ka holoka momhangulilo lwotete, omupanguli Iyambo okwa ti okamatyona oko edina lako itali dulu oku hololwa omolwa eedula da ko dinini, ota ka efelwa momake aina oo ta kala noku fya oshisho kutya otaka kala noku holoka momhangu. Ashike ngeenge oka dopa oku holoka, obeila otake i kufwa ndele taka patelwa mo. Omweeti woihokolola Marchell Hoeb, naye okwa itavela opo okamatyona oko ka futilwe mo modolongo. Oshibofa eshi osha undulilwa komafiku 13 Kotoba neudo.
MEtivali loshivike eshi, opolifi moSwakopmund oya kwata po okamatyona komido 17 opamwe namukwao womido 21 eshi va hangwa ve na oshikunino shepangwe. Ava otaku hokololwa va hangwa va twika oimeno ili 66 noshoyo ombuto yeenhi depangwe dondjudo yeegalama 615. Ei aishe kumwe oi na ongushu yoN$39 900. Omumati natango e li epupi lomido dinini, naye okwa holoka momhangulilo yaMangestalata moWalvisbay. Omlumenhu ou womido 19 wediana opamwe naFanuel Khuisab, 29, Diedrick Dausab, 29 na Richie Herero, ova hokololwa va dipaa oshifitukuti moshikunino shoinamwenyo shaNaukluft moSoondaxa. Ava aveshe ova anyenwa oku li futile mo. Omunyasha mukwao womido 21 natango koWalvisbay naye okwe li hanga konima yekumba eshi a hangwa nomafo epangwe ongushu yoN$4 250. Ou okwa kwatwa po pefimbo lokashava kopolifi.
Ouyelele wa wedwa po
–Nampa