ONGWEDIVA – Ngaashi naana kwa didilikwa kutya ounona ova ninga oihakanwa yokukwatwa onghonga kovapambele, omupopiliko wopolifi moshitukulwa shaMusati Senior Inspector Anna Kunga okwa kumaida ovadali opo va tonatele ounona vavo mefudo.

Neudo moshitukulwa shaMusati omwa potwa oibofa 101 yovanhu va kwatwa onghonga mwa kwatelwa ounona. 

Edi oda kolekwa komupedukomufala Zachariah Amakali ou e li omukulunhu koshikondo shokukonakona oimbuluma. Okwa ti unene tuu pefimbo lomafudo ounona ova ninga oihakanwa yokukwatwa onghonga kovashiinda shavo novapambele vavo osho shi li tashi limbilike moshiwana.

“Opolifi ohai lopotelwa oibofa ihapu younona va kwatwa onghonga ngeenge va fiwa meumbo novalumenhu,” ta ti.

Pefimbo va ninga eenghundafana naKundana onghela, Kunga okwa ti omudali keshe na kwashipaleke kutya ngeenge ta di mo meumbo okaana okwe ka fiya mo nomunhu omulineekelwa.

“Ovanailonga vomomaumbo navo paife ohava kwatwa komhepo yokuya moixulo nounona vashona,” ta ti.

Okwa yelifa ta ti osha fimana opo omudali a kale ta pula okaana kokakadona ngeenge ohaka longelwa omunyonena poilyo yako youkashikekookanhu.

“Opolifi oya didilikwa hai lopotwa kovadali kombinga younona vavo va kwatwa onghonga ashike ouyelele ohau ya kwa laata konima ngeenge okaana ka ningilwa omapulapulo,” ta ti.

Okwa ti omudali keshe na kwashipaleke kutya okaana kaye oke li meameno molwaashi ounona navo ove na oufemba wokuhaningilwa omahepeko omomaumbo. Kunga okwa ti natango opolifi oya didilika eshongo linene lounona hava i komafudo komaumbo ovapambele vavo ashike ohava di ko va longelwa omunyonena wopaixulo.“Ounona vovamati navo ova ninga oihakanwa yokukwatwa onghonga kovapambele vavo. Oshiwana nashi longele kumwe okukandeka omahepeko ounona momaumbo,” ta ti. Okwa kumaida oshiwana opo shi kale alushe tashi lopota omahepeko omomaumbo pefimbo molwaashi eshi otashi kwafele opolifi i ninge omakonakono noupu.

Kunga okwa ti oshiwana nashi lihumbate nawa opo shiha ninge oihakanwa yokukwatwa po pefimbo e li lomatango manene.

-fhamalwa@nepc.com.na