GROOTFONTEIN– Ovalumenhu novakainhu hava ifanwa kutya ovo ounona vekondjelomanguluko ve li 300 ova djala omanguwo, va mona eedjapo momandeulo oinima ya yooloka yopaungoba koBerg Aukas Youth Skills Training Centre kondje yoGrootfontein.
Minista wovanyasha nomaudano, Erastus Uutoni, oye a yandja eedjapo kovanyasha ovo koshiindingili sha ningilwa kendiki olo li li konyala eekilomenta 20 okudja moGrootfontein mOshitukulwa shaOtjozondjupa.
Ovanyasha aveshe kumwe 299 ova mona omadeulo oule weemwedi omuwoi mouteku woimuna, woimeno, okutunga, okuhonga oipilangi okuhondja, okuyakula ovatalelipo novapashioni, ounambelewa, okuxwikila, noku pangela eekompiuta.
Omunista oya lombwela ovadjali vomanguo ava kutya nava shune komaumbo, vaka ete po oilonga, vo va ka kwafele ovanhu vopomidingonoko davo.
“Ope na nale oimaliwa ye mu nininwa, indeni ashike ko Development Bank of Namibia opo muka pewe oshimaliwa shoku tamekifa. Oshimaliwa eshi ina shi pumbwa eameno lasha opo mu shi pewe,” Uutoni ta ti.
Minista ta weda po kutya fiyo opapa ounona vekondjelomanguluko veli 1 571 ova mona omadeulo moimhungulonga ya yooloka.
Ta ti muJanuali 2020, ouministeli waye otau ka yandja vali omaadeulo kongudu ngaashi oyo, oyo ili momusholondodo oo u li kouministeli. Ta ti omusholondodo oo ou na ovanhu veli 4 542, ovo va dalelwa kombada yoshilongo pefimbo lekondjelo manguluko. Gabriel Hendricks oo a popya ponhele yovadeulwa vakwao okwa ti okwa pandula epangelo molwa omhito yomadaulo oyo va mona.
“Ashike epangelo ina li tu ekela shi konima yomadeulo opo tu ka twikile oku mona oixuna. Natango ohatu pumbwa omwakwafo,” Hendricks ta ti. – Nampa