Omukulupe e na eedula 102, Hileni Martin ota pula ekwafo moshiwana opo shi mu yambide noikulya, oikumbafa, noikutu yovatekulu vaye.
Okwa pula yoo opo va pewe ekwafo lokapomba komeva ka kali meumbo shaashi ohava teke kokule.
Pefimbo Kundana a talela po eumbo lomukupe ou lili momukunda Oshaakondwa, moshikandjohoololo Oniipa moshitukulwa shaShikoto Martin okwa hokolola ta ti okuli moudjuu unene eshi eli novatekulu vaye veli 14, meumbo ashike kave na oikulya ya wana.
Martin okwa hokolola ta ti nonande oha kwata oshimaliwa shopendjele kepangelo keshe omwedi, ina shi wana okulanda oipumbiwa yomeumbo.
Okwa hokolola oha longifa oshimaliwa shaye shopendjela mo kulanda oikulya yomeumbo shaashi oku na oshiwana shihapu meumbo.
“Ounona vamwe oina noxee ova fya nale, omanaga vamwe kandi shi kutya ovadali vavo oveli peni. Onda fiilwa ashike ounona ngaho opo ndi va tekule ashike ihandi mono ekwafo lasha tali di kovandali vounona ava. Onghee eemhumbwe adishe dounona odili ashike komapepe ange,” Martin ta ti.
Omukulupe ota pula ekwafo kOvasamaria ovanamutimanghena opo ve mu yambidide nakashona ve na po ngaashi oikulya, noikutu nosho tuu oipumbiwa ikwao yo ku longifa meumbo.
“Ohatu teke omeva kokule keumbo lili pomukunda wetu li na opomba yomeva, omo handi futu N$100 omwedi keshe. Onghee onda pumbwa opomba yo omeva meumbo lange shaashi ondili moupyakadi unene wopomba. Efimbo limwe ohatu ka teka ketale shaashi ohandi li hange ndili meendjo domeva onghee ngeenge ndina eendjo domeva ohandi kateka ketale,” Martina ta koholola.
Omukulupe ou okwa yelifa ta ti okwa li a pewa omaano oludalo lounona veli 12 ndele veli 11 ovatetekela nale. Omukainhu umwe oya ashike a xupa po oo naye ohadi mooina omo nounona vaye.
“Okaana kange a ka daxupa po nako iha kalongo, otuli ashike naye meumbo ta fiile nge oshisho onghee naye oha xupu ashike mokamaliwa kange kopendjela. Ohandi li hange efimbo limwe nokuli ndihe na nande oshimaliwa shaasha meumbo shaashi oshimaliwa osho hatu longifa oipumbiwa aishe meumbo,” Martina ta ti.
Okwa yelifa ta ti epya lavo eli hava limi omahangu oli shona unene, iha mu di oilya ihapu ya wanena ovaneumbo.
“Efimbo limwe ohatu ka landa oilya komatala ngeenge oilya yetu meumbo ya pwa po. Omanga omafimbo amwe meumbo ihatu dungu oshikundu shaashi kape na oilya ile to hange ashike hatu li oifima yepungu. Hano ohandi indile oshiwana opo shi kwafele nge shaashi ondili momhumbwe,” Martin ta ti.
Okwa hokolola ta ti ovatekulu vaye vamwe kave na eedjapo domadalo. Ta weda po ta ti ounona ihava mono oshimaliwa osho hashi pewa eefiye nounona veli moluhepe kepangelo shaashi kave na omaufemba.
Okwa ti ova ninga eenghendambala dokuya kombelewa yakansela ndele inava mona ekwafo, onghee ova xulila mounyengwi.
Martin okwa ti iha mono oikulya yoshikukuta oyo hai di kepangelo, oha longifa ashike okalimaliwa kaye kopendjela.
Kukeshe ou ena ehalo lokumuyambida nakwatafane konomola yongodi ei 0816172905 ile a kwatafane nombewa yakansela.