Jazema Hangero
Oruveze rwa horo kovandu va Afrika okusekamena okutjanga omambo kokutja ve penge ounongo nozondunge nḓe twaererwa i yozonongo, ozondjiwe novandu ovanene.
Omakuruhungi wovandu va Afrika ngamba ye serekarerwa i yovandu vomahi warwe, ozongonḓononeno zawo ingee zeeku tjitwa i yovandu mba zu pendje, oviungurisiwa vyawo vyombazu vya kapwikirwa mozonganda zomapwikiro woviṋa komahi warwe, tji tjiri otjiṋa otjikendise keṱupa, Charles Kakomee wonganda ya Tjeja ma raisa nao morupa rozombuze mo tungovi.
Unongendo momuinyo mena rozongondjero nḓe kondja nazo zembo nda tjanga nu ngamba ndi ha muna ozombatero zokutja ri nḓurukwe. “Otjiihamise kutja ovandu mOafrika kave yandja ombango kokupwikira ondjivisiro nounongo mbu ve nawo momambo, ovengi vovanene vetu tji va koka ve yenda nounongo nozondunge.” Ongaro ndji tji ha tjaererwe po ovirumatwa vyombazu mavipandjara , no tjiwana atji sewa nombazu ohambeya ovandu ave utu okuriungurira oviṋa otjimbasewakouye.
Ouhepe wotjimariva, nozombatero okuza motjiwaṋa okuvatera ovatjange vomambo itjimwe tjoviṋa mbi wotamisa omekuriro womaraka wa Afrika, nomapwikiro vounongo nozondunge zotjiwaṋa. Ovahongwa nomitanda okunanukirwa i yozombazu, omaraka wovandu varwe itjimwe tjoviṋa ku ma kuso okukengeza kokutja ovikwatera avi ha pandjara. Ongono motjiwaṋa koviṋa vyatjo okaṋa kemwe ku ma keso’kutjevera. Charles u nembo ndi ma sokupitisa ombura ndji, posi ya mena rouhepe wozombatero ma keyakeya kutja oruroto rwe nonḓero ye ndji mape ya ai ha yenenisiwa. Otji me riyarikaṋa kotjiwaṋa, ozonganda ozoharupu pamwe novandu kourike okumuvatera na ngamwa ombatero ndji mave yenene.
“Tji tu hi nokurivereka nokusekamena ovirumatwa vyombazu yetu, matu pandjara onḓengu youndu wetu. Ngatu kare noukoze, ohura, nozongama kekuruhungi, eraka nombazu yetu,” Kakomee-Tjeja ma raisa ounahepero wokutjanga.