Auleria Wakudumo
KHORIXAS – Ovakwashiwana moKhorixas otava ti ombelela yondoongi paife otai ende tai pumbu nonande oyo i li oshivelelwa shefiku shi holike kukeshe umwe.
Tava ti paife moKhorixas nokuli eenghambe nomamwili oo a ninga oshivelelwa shaashi eendoongi otadi ende tadi pumbu pomudingonoko, ove nge we i mono paife oya ninga ondilo.
Omunangeshefa wokapana Wilhemina Armetha okwa ti ngeenge a teleke okapana kandoongi, iha ka kala po okupwa po, okuyelakanifa nombelela yongobe ile yoshikombo.
Armetha okwa ti oha kange, ta yofa yee ta teleke mombiya okapana kandoongi opo a mone oshimaliwa shokukwafela meumbo neemhumbwe dounona kofikola.
“Ombelela yandoongi oyo dingi, oyo i li monomola yotete, taku shikula onghambe omanga emwili taliya ponomola ititatu. Ame mokapana kandoongi omo handi xupile nounona vange,” Armetha ta ti.
Armetha okwa ti paife ongeshefa yaye oya shuna monima kashona shaashi oondoongi ova ninipala moKhorixas. Okwa ti paife ohava teelele va mone ombelela yandoongi okudja keefalama ashike ohapa dulu okupita vati nande oule woshivike ile fimbo limwe efimbo lile opo ovanafaalama va ete ombelela yandoongi moKhorixas.
Eshi Kundana a pula Armetha ngeenge kape na vali ombelela imwe oyo ta dulu okuninga okapana, okwa nyamukula kutya eembelela dimwe ngaashi oshikombo ile ongobe kadi holike mo moKhorixas.
Ohadi kwata vati efimbo lile opo di pwe po.
Kakele kombelela iwa, ndoongi vati okuna ombilixa shi dulife ongobe.
“Okapaki kombelela yandoongi oto ka lande ashike N$20 fiyo N$30, ashike ongobe oto i lande okapaki ke na N$50 wa yuka pombada, ovanhu vamwe ngaashi fye itatu dulu okuwanifa oshimaliwa,” Armetha ta ti.
Ovakwashiwana ova ti ondoongi vati itai ku etele omikifi dihapu ngaashi ombelela yongobe.
“Ombelela yongobe shama ashike we i li ove owa kwatwa nale komikifi adishe hadi etwa okupitila mombelela itilyaana, ashike ondoongi oto mbwangula ashike uhe na omikifi dihapu odo,” Armetha ta yelifa.
Omusamane womukulunhu naye omukwashiwana womolukanda Donkerhoek okwa holola kutya ngeenge okwa dipaya ongobe nondoongi ndele ta ningi oshasha kovakwashiwana naava hava ningi oupana, ndoongi oha pu po meendelelo vati shi dulife ongobe.
“Nande owe ya noshikombo moKhorixas pe na ndoongi kape na ou te shi lande. Oshi na okuninga omafiku manga ndoongi ta pu po efiku olo,” ta ti.