Auleria Wakudumo 

Ehangano lokuyandjaneka omeva nedina la shiivika nawa NamWater ola patulula pambelewa eepomba dakula dokupomba omeva modoolopa yaUtapi dopokafimbo. 

Eepomba dakula ohadi dindi omeva noda tulwa oikwa noipangifo okudida omeva omanga inaa longifwa koshiwana. 

Eshi ohashi nghonopaleke etondoko lomeva meenhele adishe dodoolopa oshoyo omeva ongushu moshiwana. 

Omupopiliko woNamWater Lot Ndamanomhata okwa holola kutya epatululo eli ola wedela etondoko lomeva modoolopa eshi taa pombwa paife neenghono meemilimeta 100. 

“Eshi otashi kwafele yoo opo omeva haa kale taa pataapata ile a kale a ongala mominino osho tashi dulika shi ete onguwi yomeva momunino momeva makaka,” Ndamanomhata ta ti ngaho. 

Ehangano lokuyandjaneka omeva ola holola yoo kutya opo ku kwashilipakwe kutya omeva otaa pombwa noupu, ola wedela ko opomba ikwao yopomunghulo okukwafela moipambele yosheendelela nokukwashilipaleka kutya ova yandjakaneka omeva moshiwana shaUtapi efimbo keshe. 

Eepomba dakula dokupomba omeva dopokafimbo oda endelelwa okutulwa po opo ku kwafwe oshiwana omanga ominino dakula dokupomba omeva tadi twikile okulongwa modoolopa. 

NamWater ota indile oshiwana opo shi twikile okukwata nawa omeva mokulongifa momaumbo nokukwashilipaleka kutya oshiwana osha futa omeva asho pefimbo. 

Ehangano lokuyandjaneka omeva ola holola kutya ehafuto lomeva ohali yi oilonga yavo ihapu moshipala osho hashi kala shidjuu okuyandja omayakulo opomabda nokwa endelela moshiwana. 

Mopiafe, eedjo domeva aNamWater oda fikama peebiliona N$2.8 osho tashi dulu okuya oilonga yavo moshipala nokukala inava wanifa po eudaneko lavo moshiwana lokuandjaneka omeva ayela.

-wakudumoauleria@gmail.com