I Wezi Tjaronda OTJOMUISE Ovatuta vozondu nambano maveyenene okupitisa ozondu mehi inda outomeno mehi mbuu hina kuyenena okuzepa kombunda yomazeva omape ngayakurirwe po mbongarero yapeke yOtjirata tjOnyama ape oviveke vivari mbyakapita. Okuza ku tjiyari 15 ku Kambundu nganduu tjiyeri 15 ku Suramazeva ovatuta mave yandjerwa okupitisa ozoperesende o 20 zozondu zao ndatira mehi pokati ketenga ku Kambundu mo 2006 no 30 ku Kozonjanga ombura indji. Orutuu kozombuze rOtjirata Tjonjama nduapitire oviveke vivari mbyakapita ratjere nai: ” Pokati ka tjiyari 15 ku Kambundu mo 2007 nganduu ku 15 ku Suramazeva mo 2007 ousemba ma u yenenwa okuyandjwa kotjivarero tjozondu tji tjihina okutanana ozoperesende o 20 zozondu azehe omututa ndenazo oure wombura okuza ketenga ku Kambundu mo 2006 no 30 ku Kozonjanga 2007 oruveze indui ndahinda ko katomeno okukata nandarire kutja ozondu inda zavarwa rukuru mozondu nda ningirirwa ousemba wokupitiswa mehi.” Mepeyenene okukara nao uriri ndoovazu otjivarero tjozondu tjitjayandjwa ko katomeno otjo mutututa ingo kourike we ngwapewa ousemba imbwi. Otjirata Tjonyama tja tjere morukapita veze pamunikwa omapasaneno wo vinamwinyo mbi mavii koutomeno. Ovatuta mbe hamunine oruveze ro ku tuara ozondu zao koutomeno moure womayuva 21 okuza no kutja vevituara koutomeno uvari wondero yawo wina mave yandjerwa ousemba wokupitisa ozondu zotjivarero tjingetjo tjivavanga kutja tjiyende koutomeno. O Namibia rina outomeno wozonyanda une-Otjomuise, o Aranos, Otjoruuma na Zeroue nombura aihe ri pitisa ozondu engete mehi. Rukuru ehi aa ripitisa ozoperesende o 80 zozondu zaro nu nai zarira ozoperesende pokati ko 20 no 30. Kozonjanga na Kambundu ee kweze enene ro vatuta vozondu mozofarama tji muura ovinamwinyo ovingi otja kOtjiuru Tjorupa Rovitjiukise rwo Tjirata Tjonjama, Willie Schutz. Posyo ngunda aperi nao ourumbu mburipo nai wa eterako ouzeu. Mu Seninarindi ombura yaroka kehi yaimba pu irokera mena rondanaukiro mo mwinyo weyuru mbwayetua iyomwinyo mbu tjiukwa otjo Elnino. Tjingetjo ombura ndji karako mu Kozonjanga kanaa yakarako. Ovatuta vasere okuundja ovikando vya vyo ku tuara ozondu koutomeno ape oviveke hamboumwe nganduu ku hambondatu porumwe nu munao ozondu otji ze pandjara ondjinda. Nai ape ozondu o 60,000 mazeso okupita mehi mu Kambundu na Ngarano. Nandarire kutja outomeno mehi una ondjinda, mauyenene okuzepa ozonyanda o 216,000 uriri mu Kambundu na Ngarano. Omazeva inga ma yetuwa mo maunguriro nganduu mokati ka Suramazeva omirari vyarwe tji ma vitiwa mo tuveze tuavyo.Nandarire ourumbu ma uryama komurungu. Schutz watjere karure tjandje ekweze rovitjitua imbi rwa kapita. Mo ku toka omaweziro wondengu okunyomona ovyungura o Cabineta ozombura ine ndakapita yeripura okutira ovatuta otjari okuhina kuvesutisa otjimariva ozoperesende o 15 kokupitisa ozondu mehi ndoovazu outomeno mburipo nai mehi nozonganda ozotuke zomikova maze ungurisiwa okuura moruveze indui. Otjivarero iho otjitenga tjondu mondu, pu ma pehee kutja mondu aihe ndjatire mehi imwe mai yandjerwa okipita nomwinyo mehi, tja tuwa mo maunguriro mu Suramazeva mo 2004. Iho otjitjavari tjozondu mbari mondu mu Seninarindi mo 2005 ngunda ihi tjozondu hamboumwe mondu aari mu Ndengani mo 2006 nondando iri pokutja mu Seninani ombura indji kapena ondu maikatira pendje nehi.