OKALONGO – Omupopiliko mouministeli woilonga nonghalo nawa yovanailonga Maria Hedimbi okwa ti osha fimana ngeenge ovanailonga tava pewa ouyelele nomalongo kombinga yomayakulo oo taa yandjwa kouministeli wavo.
Ovanambelewa tava longele kouministeli woilonga nongalo nawa yovanailonga ove li pyakidila nokuyandja ouyelele nehongo koitukulwa ya yooloka.
Omaandaxa nEtivali ovanambelewa okwa li ve li kOkalongo nOkahao moshitukulwa shaMusati tava kundafana novanailonga veendodo da yooloka.
Oshiwana okwa li sha hokolola momwaalu muhapu okupula omapulo kombinga yomakuto moilonga.
Okwa ti ouministeli wavo otau lalakanene onghalo nawa yovanailonga aveshe.
Hedimbi okwa ti elalakano loshikonga eshi okuyandja ouyelele kovanailonga opo va kale ve shi oufemba wavo ngeenge va kutwa moilonga.
“Otwa didilika ovanailonga vamwe vehe shi oufemba wavo. Osha fimana opo omunhu a kale e shi kombinga youfemba waye,” ta ti.
Okwa hokolola ta ti oshikonga eshi shokuyandja ouyelele otashi kelele ovanailonga vaha ninge oihakanwa yokuhepwa kovahona vavo.
Okwa ti ovanailonga nava kale ve shi omilandu odo da tulwa po kouministeli woilonga opo hava ninge oihakanwa yokuhepekwa.
Hedimbi okwa ti otava yandje yoo vali ouyelele kombinga yeendjambi odo dina okufutwa ovanailonga.
“Momudo tau ya ohatu ka tula po omwaalu wondjambi tai ka futwa omunailonga keshe movili,” ta ti.
Okwa weda po ta ti ovanailonga ove na oufemba wokufutwa oshimaliwa sholuteima ngeenge va longa eevili da pitilila.
“Ouministeli owa tula po eevili odo da ufwa okulongwa komunailonga keshe,” ta ti.
Hedimbi okwa ti oshikonga eshi ka shishi ashike yovanailonga ashike ovahandji voilonga navo ova pumbwa okukufa ombinga moshikonga eshi opo va pewa ehongo nghene ve na okuli umbatela ovanailonga wavo.