Mushiinda wounona taku fekelwa va xulifa konima yokulya etete loTop Score Instant Porridge koEastern Cape moSouth Africa Etitano, okwa holola kutya ounona ova nwa omalodu okongoma haa ufanwa omkomboti (Umqombothi) manga inava lya okatete.
Okudja Etitano, Spar naNamib Mills ova kufa mo outete voInstant meelaka deefitola sha etifwa konghundana younona vatatu va xulifa koSouth Africa, onghundana i li ya halula oilongo aishe ivali.
Namib Mills ehangano lomoNamibia, oye ha longo outete voInstant ovo ve li hava landifwa yo moSouth Africa ovo taku fekelwa va dipaa ounona.
Meenghundafana da ningwa kuRonald Masinda woshikundaneki sho-eNCA, mushiinda vati okwa ti ote lipe ombedi, shaashi vati ounona ova li ponhele pe na ovakulunhu ovo va li tava nu Umqombothi wavo shaashi vati olusheno ola li la wa ko nounona navo ova nwa Umqombothi.
Umqombothi vati omalodu opamufyuululwakalo moSouth Africa, haa dungwa momapungu, oilyavala, nomeva.
Mayola woEastern Cape Princess Faku okwa li vati a ka talela po omadimo avali oo e li moluhodi lounona vavo.
Vati xe younona oye kwa li a ka landa okaInstant nokonima okwa mona ounona tava kungu nokuxulifa konima yokafimbo.
Faku okwa ti ova popya novakwanedimo.
“Otu wete kutya ovakwanedimo kave li monghalo i li nawa, nohatu kendabala tu mone kutya ohatu va kwafa ngahelipi,” Faku ta weda po.
Nande ongaho, vati otava teelele oidjemo ngeenge omidimba da tandwa, va mone kutya esheetifo shefyo oshike kondadalunde.
“Otwa talela po ounhele vahapu hava landifa opo tu tofe mo ovanhu ovo tava landifa oikulya inai ufwa notwa kwata po vamwe,” Faku ta ti.