Auleria Wakudumo
Ongudu yovanhu ve li 99 ovo va yambidida mefiku ledimbuluko lomapendafule kOmuthiya vati kakwa li va kutwa ongovanailonga, ndele ova li va pulwa ve liyambe vo va kwafele mefiku olo.
Ngoloneya woshitukulwa shaShikoto Penda Ya Ndakolo okwa ti kapa li omaudaneko asha a ningilwa ovanhu ovo va kwafela moule wokulongekida efiku lokudimbuluka omapendafule la dimbulukiwa mo26 Aguste 2024.
Ashike vamwe vongudu yovanhu ovo oya ti ova pewa okamaliwa kanini unene, ova li va wana okupewa shi dulife N$400 oyo va mona molwoilonga va longa.
Ovanailonga otava ngongota kutya ova longa eevili dile nomafiku mahapu nove udite va monifwa oixuna kepangelo shaashi inava futwa oshimaliwa sha wana.
Ashike Ya Ndakolo okwa ti “epangelo mwa kwatelwa ombelewa yoshitukulwa shaShikoto, kai na oimaliwa yokufuta, sho osho inava kongela ovanhu ovo tava futwa.
“Ombelewa yange oya pula ookansela va konge ovanhu ava tava dulu okuliyamba va kwafele okutula kumwe oshivilo nova li hava pewa okulya efiku keshe,” Ya Ndakolo ta ti.
Ovanailonga ova yelifilwa nokushiivifilwa vati pehovelo kutya kape na ofuto.
Ovanailonga otava ti movanailonga 110 va kwafela okulongekida edimbuluko lomapendafule mo 26 ova pewa ashike N$300 omanga ava va longa omafiku 11 va wedelwa ko ashike N$100.
Nonande navo ova holola kutya ova li tave liyambe shili, ova ti:
“Out udite ko kutya oitukulwa imwe ya dimbulukwa oshivilo sha faafana oya yandja omayovi kovaliyambi, omanga fye hatu mono ashike N$400,” tava ti.
Ya Ndakolo okwa ti nande kapa li ofuto, ova yandja oshimaliwa eshi sha xupa kelongekido ledimbuluko lomapendafule kovakwashiwana ovo va kwafela opo va yandje olupandu.
“Oshitukulwa osha mona oshimaliwa okudja kepangelo shelongekido lefiku lomapendafule nokashona aka ka xupa po, otwa pandula ava ve tu kwafa,” Ya Ndakolo ta ti.
“Ovanhu inava futwa ndele ova pandulwa eshi va kwafela,” Ya Ndakolo ta weda po.
Ya Ndakolo okwa ti komesho yomafiku oshiwana itashi ka pulwa vali shi kwafele epangelo ngeenge osho tashi twikile ngaho.
Okwa weda po tati ovanhu paife vati ova hala ashike okuninga keshe shimwe opolitika nonande hasho shi li. –wakudumoauleria@gmail.com