Ovadali vounona hava fikola pofikola Ekangolinene Combined ova ongela oshimaliwa shoN$15 000 shokuwapaleka eengulufikola odo kwa li da pepwa po komhepo.
Neudo okwa lopotwa ovanafikola pofikola ei i li moshitukulwa shaMusati va fiwa pomutenya koshikungulu osho sha pepa ko oipeleki nokuhanauna eengulufikola nhatu.
Eengulu da pepwa po ohadi longelwa ovanafikola vondodo onhinhatu, aveshe kumwe ve li 100.
Ofikola Ekangolinene Combined oi li moshikandjohongo Etayi.
Kape na omunhu a lopotwa a monena po oshiponga molwaashi oshiningwanima osha ningwa pefimbo kuhe na eetundi.
Omukulunhufikola pofikola Dasken Mushabati okwa pandula ovadali eshi va yambidida ofikola.
Mushabati okwa hokolola ta ti ounona ve li mondodo onhinhatu inava tumwa komaumbo molwaashi otava kala va kale konima noinyangadalwa yavo yofikola.
Okwa ti osha fimana opo ounona va pewe eetundi de lixwa po unene tuu ketameko loshikako shotete.
“Otwa ninga onghendabala yokulongifa etungo hali longelwa eetundi dokompiuta omanga vamwe otwe va twala ketala oku haku ningilwa omitumba dovadali,” ta ti.
Okwa weda po ta ti ofikola yavo otai lalakanene ehongo longushu kokaana keshe opo ounona va pite noidjemo iwa kexulilo lomudo.
Omukulunhufikola okwa ti ofikola yavo oya pumbwa eengulu dokulongela di li hamano molwaashi ovanafikola vamwe ova finana mo meengulu omanga vamwe ohava longelwa moipeleki.
“Out na yoo vali eshongo lombelewa yokukala ovahongifikola shaashi ovahongifikola 38 ohava longifa ombelewa imwe va finana mo omanga omafimbo amwe ovahongifikola vamwe ohava kala koshi yomuti ile meetuwa davo molwaashi kape na onhele,” ta ti.
Mushabati okwa indila ovanangeshefa nomahangano a yooloka opo a yambidide ofikola yaye.
Caption: Omhepo… Engulufikola da pepwa po komhepo kofikola Ekangolinene Combined moEtayi, moshitukulwa shaMusati. Efano: MICT