Taimi Haihambo 

ONGWEDIVA – Elelodoolopa laNgwediva ola holola enyeme lavo, molwovakalimo vomodoolopa inava hala okuidilila eembwa davo odo tadi li ovaendi kolupadi momapandavanda. 

Omukulunhu koshikondo shomidingonoko nonghalonawa youndjolowele melelodoolopa laNgwediva Penda Kashihakumwa okwa ti neudo ova didilika oibofa ya koya po10, yovanhu va lika vo mamwe va monifwa oiponga keembwa daNgwediva. 

Eembwa dihapu ohadi li ashike ovanhu tava ende momapandavanda, osho tashi ulike kutya, ovanhu itava ende vali va manguluka shaashi oovene veembwa inava hala okwiidilila eembwa davo nawa. 

“Omunhu ngeenge wa lika kombwa ou na oufemba woku ka patulula oshibofa, to shi patululile mwene wombwa. Nande mwene wombwa okukale e ku pa oikwafifo yoku ku twala koshipangelo, ndele owu udite kutya kwoove mwene inashi wana, ou na oufemba wokupatulula oshibofa natango kopolifi,” ta ti. 

Kashihakumwa okwa twikila kutya vati, Olomakaya natango vali ove na oshibofa shitalala sheembwa da nhuka meumbo ndele tadi ka lya omunhu, oo e li moshipangelo shaMedipark. 

“Eembwa edi da lya omunhu otwe di kufa ko, ndele hatu di twala ko kokapangelo keembwa, oko da ka konaakonwa omukifi wendabi. Ngeenge oda monika omukifi wendabi, ohatu di dipaa. Ashike ngeenge inadi monika ohatu ke di tembula mo modoolopa,” ta yelifa. 

Okwa ti keshe omukalimo e li mOngwediva noku na ombwa yaye i li meumbo, na kale a fya oshisho kutya oi li metonatelo li li nawa, opo iha lye ovanhu. 

Okwa yelifa yo kutya ovanhu ava ve na eembwa da nyika oshiponga ngaashi ee pit bulls, odo hadi dulu okunhuka oluumbo, nava kale alushe va fya oshisho kutya omaluumbo avo oku na eehofa dile, omo ombwa itai dulu okunhuka noudjuu, shaashi eembwa davo otadi li unene ovanhu. 

“Ohandi kunghilile yo ovanhu ava hava kala oihakanwa yokulika keembwa va kale hava kala va manguluka okupatulula oibofa,” Kashihakumwa ta ti. 

Okwa yelifa ta ti ou e na ombwa yaye ya lya omunhu vati ote ke i kufwa itwalwe kokapangelo keembwa i ka konaakonwe omukifi wendabi. 

Okwa weda po ta ti nongeenge oya monika omukifi oo, otai ka dipawa ile ngeenge oya ka kala inai monika otai kufwa mo modoolopa. 

-taimihaihambo2000@gmail. com