Festus Hamalwa
Omupopiliko wouministeli womidingonoko, omakuti nomatalelepo Romeo Muyunda okwa ti neudo ovafekelwa 106 ova kwatwa po eshi va hangika tava dipaa oifitukuti ya amenwa i li kEtosha National Park.
Okwa ti ovafekelwa 44 ove na oibofa yokudipaa eemhanda omanga ovafekelwa 62 ova kwatwa po moibofa yokudipaa eendjaba. Muyunda okwa ti ovafekelwa va kwatwa po omwa kwatelwa omwaalu muhapu wOvanamibia ve li 93, ovakwashiwana vaAngola vahetatu noshoyo ovakwashiwana vaZambia vatano.
Okwa weda po ta ti ovanhu omuwoi ova pewa eedula modolongo mekwatafano loibofa iheyeli yeendjaba da dipawa omanga vavali omekwatafano loibofa yokudipaa eemhanda. Edi Muyunda okwe di popya momukandapitifi ou a pitifa Olomakaya eshi ta kunghilile oshiwana opo shi kale alushe tashi lopotele opolifi kombinga yovanhu tava dipaa oifitukuti ya amenwa.
Okwa ti unene tuu pefimbo e li lomatango manene ouministeli wavo owe lilongekida okukala wa tula po omilandu dokuamena oifituku shaashi okwa didilikwa ovanhu ve hole okuya kEtosha va ka dipaye oifitukuti pefimbo lomatango manene.
“Ovambelewa hava longo koshikondo shokuamena oifitukuti otava ka kala tava longo efimbo keshe opo ku kelelwe oumbudi wokudipaa oifitukuti,” Muyunda ta ti. Muyunda okwa weda po ta ti neudo okwa lopotwa eemhanda 63 da dipawa, omudo 2021 omwa lopotwa eemhanda 44, omudo 2020 omwa lopotwa eemhanda 42, omudo 2019 omwa lopotwa eemhanda 57, omudo 2018 omwa lopotwa eemhanda 83 omanga omudo 2017 omwa lopotwa eemhanda 55 da twala konakupila.
fhamalwa@nepc.com.na