ONGWEDIVA – Elelongerki laElcin vati ola kufa ovafitaongalo vahamano oshinakuwanifa shoufita shaashi vati va ka longela koshikondo sheedolongo.
Ovafita vane ovakainhu omanga vavali ovalumenhu, mwa kwatelwa Reverend Esron Heita Kapolo oo a xulifa oshivike sha dja ko koshipangelo koWindhoek. Kapolo okwa hangika ta longele kendiki leedolongo koKeetmanshoop.
Otaku hokololwa omudo wa dja ko, oshikondo shomavyulonghalo sha pitifa eemhito tashi kongo ovafitaongalo va yooloka va ka longele komandiki omavyulonghalo a yooloka moshilongo.
“Okudja opo otwa ninga omaindilo ndele hatu piti mo nokuifanwa tu ye komadeulo,” umwe womufita ta hokolola.
Omufita ou okwa hokolola ta ti ova shangela elelongerki omukanda kutya otava i komadeulo oku ka longa komandiki eedolongo. Ashike opa pita efimbo lile inava nyamukulwa fiyo va ka tameka omadeulo muApiilili 2024.
“Commissioner General Raphael Hamunyela (kakukutu koshikondo shomavyulonghalo) naye okwa kala aa teelela a pewe enyamukulo, ashike ina i uya pefimbo olo la li la teelelwa,” omufita umwe ta hokolola.
Eshi enyamukulo le ya ova lombwelwa ashike kutya omolwonghatu oyo ve likufila yoku ka konga oilonga kepangelo, inava talika ko vali ongovafita vaElcin.
“Elelowiliki laElcin ole tu nyamukula kutya ngeenge ohatu ka longela komandiki eedolongo natu fiye po oshilonga shoufita molwaashi Elcin ine tu tuma koshikondo sheedolongo,” ta ti.
Vati omhango yaElcin inai ufa opo ovafita ve likufile oilonga yepangelo ngaashi hai holoka po koshikondo sheedolongo, kopolifi, noko-NDF. Vati omunhu opo a ye ko oku na okuninga eindilo oku pitila mongeleka, ye opo nee ta tuminwa komauministeli oo – ta ka longa a kalela po Elcin.
Odjo imwe oya holola kutya oshinima shokutumwa okudiilila kongeleka osha kala sha djuupalela ovafita vahapu, shaashi vati ovo hava tumwa ko ovo vo ashike va fika po povakulunhu. “Otashi dulika osho sha etela ovafita ava ve likufile omatokolo oo okuninga omaindilo va yukilila, inava pitila mongeleka shaashi omwa nyika eembuda,” odjo tai ti.
Omadeulo ovafita ovo va taatawa muElcin ova mana omadeulo avo nokutuminwa komandiki eedolongo a yooloka.
Ovafita ava va ile momadeulo okwa li ve li omuwoi aveshe kumwe, ashike vatatu inava pita mo.
“Paife ngaha ihatu longo vali oilonga youfita ngaashi okuninga omashasho, omakoleko, okuninga omayakulo ouvalelo uyapuki nosho tuu omayakulo amwepo,” umwe womwaavo ta ti. Ta ti paife otava longo komandiki okuyakula ovanadolongo ngaashi okulonga eetundi dekoleko, okuyandja omayakulo exungomwenyo nokulonga otundimbibeli.
“Paife otwa indikwa okulonga oilonga yetu youfita oyo twei lihongela nokuideulilwa. Katu udite ombili kombinga yoshikumungu eshi,” ta ti.
Omufita mukwao okwa ti ova ninga eindilo kongeleka opo oshinima shavo shi talike, pamwe tava filwa ngaho onghenda vo va kale tava longo oilonga youfita.
Okwa weda po ta ti paife ohava ufana ovafita tava di kondje va ka ninge omayakulo ngaashi omashasho, omakoleko nosho tuu. “Ohatu longo shili mepangelo, tu na eendjabi di li nawa, ashike omunhu ou udite nai shaashi ito longo oshilonga shoye ngaashi we shi lihongela. Otashi ehameke omunhu komwenyo,” omufita umwe ta ti.
Eshi a kwatafana naKundana omuyandji womauyelele waElcin Thomas Uushona okwa koleka ta ti oshoshili ope na ovafita va ka longela komandiki eedoolongo ashike inava tumwa kuElcin.
Okwa yelifa ta ti Elcin oku na omilandu nomakotamhango a pumbwa okulandulwa kukeshe omufita.
“Elcin oku na oshinakuwanifwa shokutuma ovafitaongalo va ka longele koshikondo shopolifi, ketanga leameno nosho tuu koikondo ya yooloka moshilongo.
Elcin ina tuma ovafita ava va ka longele kendiki leedolongo ndele ove likufila onghatu vo vene osho shi li kondje yekotamhango letu,” ta yelifa.
Uushona okwa yelifa ta ti ngeenge omufita okwa ya koshikondo shonhumba a ka longela ko ina tumwa kuElcin nena otashi eta opo a fiye po oshilonga shokukala omufita waElcin.
Okwa ti oshikumungu inashi pwa okukonakonwa molwashi natango oshi li keembelewa delelowiliki laElcin tashi ningilwa omapekapeko.