Jazema Hangero

Onongo Michael Tjivikua ma ningirire ovahongwa okukara nondengero kOzomiṱiri nokuzevara.

Ma tja ovo moruveze rwawo ve rihonga ovingi okuza kotjiuru tjosikore tjoruveze ndwo omuyaruke Gabriel Mbuende. “Ouyenda womahongero ngunda u ri komurungu weṋu, muri poruveze ndu ri ro mu mwa pitira ovandu ovengi mba karira ozonongo, ozoindjiniya, ozonesa, ozohahende. Kongoreree ondjira ndjo kokutja muhuka yandina mu karire oviṋa mbi mu zera,” ma tja. Eye nOnongo Kuiiri Tjipangandjara vari norupa orunene pomayandjero wozondjambi kovahongwa vOst.Barnabasa Oritjatano nda zuko. “Okutenga ovanene, okurisuvera, okukara nongamburiro move omuini kutja mo yenene okutjita ngamwa otjiṋa ku wa yandja kombango nomasa woye ayehe,” Tjivikua ma raisa kutja ooviṋa mbi mavi vatere ovahongwa kutja ve kare noruyaveze ndu hi noviṱwatungo. Na weza kutja omahongero ye paturura omundu ouripura, ye mu pa oumune wapeke tjazumba ouripura womundu u kura tji me rihongo na weza kokutja oviṋa ovahongwa mbi mave rihongo nai mavi kevevatera moruyaveze. 

Tjivikua wa patere ama yandja omaronga wokurirongerisa momerihongero na tja: “Okutjanga oviṋa omuhongwa mbi ma hongwa nokuviresurura eyuva arihe pamwe nokuhina okuwomba okuuta okurirongerisa; nokupaha ombatero tje hi nokuzuva oozongunḓe ozonahepero tjinene momuinyo womuhongwa.” Na zeri kutja kombunda yozombura omurongo ma kamune ozonongo, ozonesa, ozomiṱiri pamwe nozoporise nḓu maze kaza movahongwa. 

Onongo Tjipangandjara oure wozombura ndano u yandja ombatero yotjimariva otjohambwarakaṋa yokuvatera omasembamisiro womayandjero wozondjambi kovahongwa mba ungura nawa povakwao. Mokati kozondjambi nḓa taarerwe i yovahongwa: Ovahongwa 8 mba ungurire nawa povakwao avehe mozondondo nḓa 1-4 va mwine oukarata wonḓengu yotjimariva tjozondora za Namibia o-600 N$. Mbu mave yenene okukaranda nawo oviungurisiwa vyosikore vyozondora za Namibia o-300 N$ pOwaltonsa.