EENHANA- Ovakainhu ve li humbata va kalela oshipangelo kEwalanda mEenhana otava nyenyeta tava ti ohava ende momeva akaka oo atalama moulikoshelo nova lulilwa yoo kedimba tali di momeva onyata e li konima yeenduda davo.
Ewalanda onhele oyo hai kala ovakainhu ve li momateelelo hava ka teelela ngeenge ve li popepi nokupuluma.
Ovakainhu ovo hava kala mo, ovovo unene hava di komikunda dokokule nohashi va kwafele vaha ende oinano ile eshi efimbo lokumona ounona tali fiki.
Ohava futu N$22.50 koshivike keshe, mwa kwatelwa omayakulo omeva nolusheno ashike oha ve li landele oikulya yavo vene.
Lonia Elia a dile komukunda Otunganga okwa hokolola ta ti ove na omhito okukwatwa komikifi odo hadi etwa kekako shaashi ohava ende momave akaka.
“Ngeenge owai moundjuwo nomoulikoshelo oto hange mo omeva akaka aatalama osho shi li sha nyika oshiponga kufye,” ta ti.
Okwa yelifa ta ti ove na ashike okulikoshela monhele ya talama omeva shaashi ova pumbwa okulikosha.
Lusia Hamata a dile kEtomba okwa ti onghalo yokewalanda oidjuu shaashi ova taalela omashongo a yooloka ngaashi okukakonga oikuni kokule oshoyo okutekela pomafiya a londa.
“Omafiya okwa tungwa a londa pombada unene osho sha nyika oshiponga komukainhu e li meetelelo,” ta ti.
Eshi a kwatafana naKundana Mayola wodoolopa yaEenhana Omri-Onn Kavandje okwa ti elelo lodoolopa yavo ola lopotelwa kombinga youpyakadi wa taalelwa kewalanda.
“Otwa tula po nale omutengenekwafaneko woshimaliwa tashi ka longifwa okulongulula ewalanda. Ovakainhu ova fimana shaashi ohave tu etele omaludalo,” ta ti.
Kavandje okwa ti elelo lodoolopa yavo ola tula po eudafano loshiputudilo shopaungomba shaEenhana VTC opo shi ka longe oinima oyo teka kewalanda.
“Eenhana VTC ota di katuma ovalihongi vaye kewalanda opo va ka ninge omapekapeko kombinga yoinima ya kulupa kewalanda. Okudja opo ohatu ka longekida oshimalilwa shokulongifa onhele ei.