Ovakainhu ova ninga oihakanwa yokutulwa mokatoo keendudu nohava kanifa omaliko avo unene tuu oshimaliwa, hashi pitile moku ningilwa omatilifo koonamunganga ovo vehe shi voshili. Edi oda kolekwa komukulunhu wehangano loMonica Gender Equality Human Rights and Social Justice, Shaanika Nashilongo eshi a hokolola ta ti ombelewa yavo oha i lopotelwa omanyenyeto ovakainhu vahapu va ninga oihakanwa yoku tulwa mokatoo keendudu. Meenghundafana a ninga naKundana Etine Nashilongo okwa ti ovakainhu vamwe ova ya keembelewa davo tava kwena, va ningilwa omatilifo keendudu. Eendudu odo doipupulu luhapu oha di ningile ovakainhu omatilifo kutya otava fi ngeenge ina va futa oshimaliwa.
“Ovakainhu va ninga oihakanwa ova hokolola tava ti ohava ningi omakwatafano needudu odo, hava shakeneke komalungula. Okudja opo ohava pulwa opo va tumine ondudu ovidio vavo inava djala sha, ashike konima ohadi tanauka noku ninga omatilifo kutya ngee da pewa okavideo,” ta hokolola.
Okwa yelifa ta ti eendudu dopaife ohadi tula komalungula ouvidio voipupulu kutya ohadi kwafele ovanhu ve na omaupyakadi a yooloka nelalakano lokunana ovanhu vahapu va ye kudo opo di ningi oshimaliwa shihapu.
Okwa hokolola ta ti eendudu dimwe ohadi tumu ovanhu opo va ninge omapekapeko kombinga yomunhu opo ngeenge mongula eshi omunhu tai keendudu ota lombwelwa ouyelele womondjila. Onghee okwa ti naashi oha shi eta opo omunhu hai tavele eshi ta lombwela keendudu shaashi oha kala a ningilwa omapekapeko. Okwa kumaida oshiwana opo shi kale sha kotokela eendudu doipupulu odo di hole okukala komalungula tadi kengelele oshiwana.
Omukainhu umwe ha ngala a ninga oshihakanwa shokutulwa mokatoo kondudu okwa hokolola ta ti okwa li a ninga ekwatafano nondudu imwe okudilila komalungula nokudja opo okwa pulwa kondudu opo vati a tumine ondudu okavidio kaye ina djala oikutu.
“Ondudu oya pula ngeenge kutya ngeenge onda hala ongeshefa yange i kale tai ende nawa na ndi tume oshimaliwa N$5000 ile ndi tume okavidio kange ina djala oikutu,” ta ti.
Okwa ti okudja opo okwa lopotela ehangano loMonica Gender Equality Human Rights and Social Justice kombinga yondudu tai mu pula okavidio kaye shaashi okwa li she mu tilifa.
fhamalwa@nepc.com.na