Auleria Wakudumo 

Ombelewa yomupresidente oya holola kutya ovakalelipo aveshe ovo va ulikwa okukalelapo oshilongo kondje yoilongo ova ulikwa pawuyuuki. 

Omupopiliko wombelewa yOmupresidente Jonas Mbambo, okwa yelifa kutya omawuliko ovakalelipo ava inaa ningwa konima yomakuma ngaashi omapopyo amwe taa ti kutya vati ope na omauliko amwe e likundwa meholamo. Okwa ti eshi osha puka notashi pukifa oshiwana. 

“She likolelela komilandu dokukalelapo oshilongo, omukalelipo oha ulikwa lumwe. Omukalelipo oha dulu yo okuulikululwa opo a lunduluke konhele oko a li a tulwa a ye kuikwao, hashi ningwa kwa landulwa omilandu daNamibia,” Mbambo ta holola ngaho. 

Omudo wa dja ko, Omupresidente okwa li a ulika ovakalelipo vamwe ovo tava dulu okukalela po oshilongo. Neudo, natango komwaalu okwa wedelwa eshi a ulika natango ovakalelipo vape osho yo okulundulula vamwe. 

Ovo va ulikwa kOmupresidente omwa kwatelwa omupopiliko wombelewa yOmupresidente nale Alfredo Hengari. Hengari okwa ninga omupopiliko woshilongo koBelgium. 

Omupresidente okwa ulika yo ngoloneya woshitukulwa shaHangwena nale Walde Ndevashiya a ninge omupopiliko woshilongo koNigeria omanga Goms Menette a ulikwa a ninge omupopiliko woshilongo koZambia. 

Nandi-Ndaitwah okwa ulika yo omukulunhuwiliki mouministeli wounamapya nounaimuna, eeshi, omeva nomatalululo omadu Ndiyakupi Nghituwamata a ninge omukalelipo woshilongo koGhana omanga Rosina //Hoabes a tumwa a ka popileko oshilongo koJapan. 

Weich Murcle Uapendura Mupya okwa ka kwatela komesho oiniwe yoshilongo koEgypt omanga David Thomas a tumwa a ka kalele po oshilongo koZimbabwe. 

Omupresidente okwa ulika yo Leonard Iipumbu oo taka kalelapo oshilongo koAngola, Samuel Mbambo okwa ninga omukalelipo waNamibia koAlgeria, omanga Tonata Emvula a ninga omukalelipo woshilongo koChina. 

Hopelong Iipinge okwa tumwa a ka kalele po oshilongo koCongo Republic, Lebbius Tobias okwa ya koCuba, Sipapele Sipapele okwa uka ko-DRC, Benjamin Kandanga a tumwa koFinalnd, Sabine Bolhke-Moller a uka koFrance naJerobeam Shaanika ta ka kalela po oshilongo koGermany. 

Omutwe woshilongo owa ulika yo Penda Naanda, oo a ninga omukalelipo woshilongo koNew York, Monica Nashandi a uka koRussia, Frieda Iithete okwa uka poushiindalongo poSouth Africa, omanga Elvis Shiweda a tumwa koSwitzerland, Sophia Nangula okoSweden, HC Sinimbo a uka koTanzania, Veiccoh Nghiwete a ninga omukalelipo woshilongo koUnited Kingdom, naWilbard Hellao a ninga omukalelipo woshilongo koWashington. 

Omupresidente okwa holola kutya okwa ulika ovakalelipo voshilongo koilongo ya yooloka she likolelela koveta onhinatu yokatendo kativali (c). 

Okatendo oko ohaka pitike Omupresidente a tofe nokuulika ovo a tala kutya ove na owino yokukalela po oshilongo kondje yoilongo ya yooloka. 

Nandi-Ndaitwah okwa holola kutya oku na elinekelo mwaavo a tuma kutya otava ka longa ngaashi va teelelwa okutula nokuyakula oshiwana. 

“Ohandi mu indile opo mu ka amene oshiwana shaNamibia osho shi li kondje yoilongo kutya nee otashi lihange peni mounyuni,” ta ti ngaho. 

Omupresidente okwa dimbulukifa ovakalelipo voilongo kutya ova teelelwa va kale have lilopota kombelewa kutya ova longa ngahelipi. 

-awakudumoauleria@nepc.com.na