Abraham Mwanyekange 

Omukunda Okambebe A, owa mona onhele yomaendo ape. 

Mwene womukunda Two-Boy Wahengo okwa ti omukunda owa mona onhele yomaendo e lifikamena po noe li koshi yelelo lomukunda. 

Okwa ti mopaife otashi kala shipu kukeshe omunamukunda a hala omukwapata waye a pakwa momaendo omomukunda. 

“Ngeenge owa tale paife omaendo ahapu oku li momawiliko eengeleka donhumba nodongadi nongeenge ku li oshilyo shongeleka oyo ohashi dulu oku ku ningila shidjuu opo mu pake omukwapata weni,” ta ti. 

Okwa weda ko ta ti mopaife nomupaani ota dulu okufudikwa momaendo womomukunda. 

Wahengo ota longifa omhito ei, ta pula omakwafo opo va mone kutya omaendo omukunda a tulwa moluumbo li li nawa. 

“Otwa hala ovafi vetu va tulumukwe mombilli, omamanya eembila davo aha longelwe omunyonena washa, onghee ohandi indile kOvasamalia ovanamutimanghenda vetu va vatele naako ve na po,” ta indile. 

Ovafitaongalo ove na omaliudo a yoolokafana kombinga yomaendo. 

Omuyandji womauyelele waElcin Thomas Uushona okwa ti, ongeleka yaElcin oya dana onghandangala okutota po omaendo. 

“Ongongereki ohatu pula edu koovene vomikunda opo tu pake ovakwaneongalo vetu ngeenge va fiya po ombada yedu,” Uushona ta ti. 

Okwa weda ko kutya momaendo ongerki ohamu fudikwa keshe umwe kakele ope na elandulafano olo hali ningwa po unene okuninga eindilo opo omukwanepangelo wongereki imwe a mone evatelo. 

Uushona okwa ti ove na ekwatafano liwa nongongahangano yongereki yaCatholic naAnglican ngeenge tashi ya pokulongifa omaendo. 

Omupopiliko wongereki yedina True Gospel Ministry Noel Lazarus okwa ti, luhapu eengerki dopatatu ohadi kwatele ovakwaneongalo ovo va waimina eengeleka dopamepo onghone, ta tumbula kutya shimha va shuna ko tava ka pula omakwafo nena ohava dulu oku a anyenwa. 

-abbenghilai@gmail.com