I Magreth Nunuhe
OTJOMUISE- Omurumendu omutjiukua motjiwana tjOvaherero nguaapatasanisa kutja ovina tjiva mombazu ovio vakazendu uriri poo ovio varumendu uriri watire.
Vevangua Muuondjo watirire mOnamiti yOhoromende ya Katutura Osondaha nozombura o 43 kombunda youvere oure. Eye wari omundu otjiwana tjozoserekaze zombazu kaazesekamene tjinga eye ee vekutire ovikaiva eye omuini wina maahupu okuzira pokarupoko ke poruveze rozongetjefa rongomainde ya Tjomuise indui ro Soweto mOkatutura paakutire ovikaiva imbi. Wina eye aatjiukua otjomutone woutjina wa katjoruhonga. Okupingasana nombazu yOvaherero oyo ndjiyandjera ovakazendu porue mondjuuwo yetando, Muuondjo mondjuwo indji aahiti nariri punovakazendu. Muuondjo tjingetjo mazemburukua otjomutjiwe wombazu nongaro novitjitua viomuhoko.
Jakuua Katjivikua, epenga romuyaruke memuzemburuka otjauyekomeho, omuriyandjere nomuna viungura ovitue momake. ™Aatjiua kutja maunguratjike. Wapanda okuraerua kutja viovakazendu oviovakazendu noviovarumendu oviovarumendu otja kombazu yOvaherero,∫ Katjivikua matja naweza ko kutja nandarire kutja tjiva aave muhembe kutja weritua movitjitua mbivarua otjoviovakazendu, katjina tjitjemutjayera.∫ Matja Muundjo aanangua tjinene kovitjitua viombazu otjomuhungire poo otjomuhonge wovakazendu outjina poo okuhangununa petando. Muuondjo Omukuejuva wo Hauari, omunaa Kuendata woya na Ngejama ngujanenua mOvakuenambura uo Nandjou. Omuramue Mbinaune memuzemburuka otjomundu wovandu, omurisusuparise nondjandje. ™Tuapandjara omundu, ombangane. Kaari nomahongero posia uari nozondunge za Mukuru,∫ Mbinaune wawezako natja omahongero we wokombanda inga ngukuza o Masters Degree yari mokukuta ovikaiva mbiemuyetera outumbe. Marapo Kazongominja, eye nguahisimisirue iyoviyandjeua via Muuondjo ovingi memuzemburuka otjomundu nguari nomituka nu nguari norusuvero orungi nongaro novitjitua viomuhoko. Matja aruhe aapandere pongaro ombua yombazu. Muuondjo wakuaterua nekurire mOzonduno mOtjinene. Eye waseko ina, Soroi Muuondjo, omukazendu we novanatje omurongo naumue.