Auleria Wakudumo
Ovakulupe vahamano ove li mongudu yovanahambo ovo va yashwa neeholo domakenya nokukwatwa po kopolifi kOkashana KuUkongo waNehale molwoikolokosha yedu loulifilo.
Ovakulupe ve li pokati keedula 64 fiyo 72 ova li va teelelwa va holoke momhangulilo yaMangestelata moTsumeb onghela, eshi va tulilwe moipandekifo nokulemanekwa Olomakaya shaashi va teta eedalate da fika puhamano.
Otaku hokololwa ovanahambo oshoyo ovakwashiwana vomikunda da dingilila Okashana ove likufila oveta ndele tava hanauna po eedalate doohandimwe vamwe ve shiivike navamwe vehe shiivike, vamwe tava feekelwa ovanashimaliwa novamwe ovanapolitika.
Vati omanga va pwila mo tava tete eedalate, opolifi yaShikoto oya holoka meendelelo opo i hanaune ongudu yovanahambo novakwashiwana. Opolifi vati oya umba ongudu neeholo domakenya nokukwata po ve li 20, mwa kwatelwa omunashipundi wovanahambo vOukongo waNehale, Christian Indongo.
Ovanahambo ova ti ovakwashiwana ve dule pomulongo nasha mwa kwatelwa ovakulupe ova lemanekwa nova ka mona ouhaku koshipangelo omanga vahapu inava ya koshipangelo shaashi ova tila okutulwa modolongo. Ongudu yovanahambo novakwashiwana vati oya londa meetuwa 30 lwaapo ve na omakatana, omakuva, eeshange needibo. Eedalate dimwe vati oda hanaunwa po ndele tadi tomekwa omundilo. Mopaife, ovafekelwa 20 ova mangwa po nove li meenduda deenghwatwe pombelewa yopolifi mOmuthiya novateelelwa va holoke momangu yaTsumeb nena.
Omukonakoni woimbuluma mOshikoto, Omupedu Komufala Titus Ekandjo okwa koleka oshiningwanima eshi. “Eedalate hamano oda hanaunwa po,” Ekandjo ta ti.
Ovanahambo novakwashiwana vopomikunda da dingilila Okashana ova li va tula mo omunyanyo wopambili mu 5 Septemba 2024 nova yandja omakemo avo kombelelwa yangoloneya waShikoto Penda Ya Ndakolo tava pula a xulife po eedalate mOkashana ponhele yedu lovakwashiwana loulifilo.
Ovanahambo novakwashiwana ova ti kutya eedalate oda kufa ko edu lihapu nova fiya ovakwashiwana vehe na onhele youxupilo.
Momakemo avo, ova li va yandja ngloneya nelelo ledu mOshikoto va kufe po eedalate nokuxulifa po eedalate dihe li vati paveta mokati koshiwana fiyo 13 Septemba 2024. Eshi va yandja omakemo avo kombelewa yangoloneya, ova popya kutya ngeenge kape na ou ta udu omakemo avo, otava ka hanauna po eedalte voo vene osho va ninga mOlomakaya.