Omukulunhu wopolifi koshikondo shokukonakona oimbuluma moshitukulwa shaHangwena omupedu Commissioner Zachariah Amakali, okwa koleka ta ti ovakulupe vavali ovo va hangelwe moixwa komukunda Okanghudi, ova dipawa koluvadi.
Okwa li taku fekelwa kutya Miriam Johannes weedula 77 nomonamati Simon Petrus weedula 61 otashi dulika va lya oudio peendingosho, ashike Zachariah ota ti oidjemo yomakonaakono a ningilwa omidimba davo oye uya, noya yeleka kutya ovaandwa koluvadi.
Oshiponga eshi osha ningilwe momukunda Okanghudi moshitukulwa shaHangwena momafiku 17 omwedi wa dja ko.
Ovakulupe ove lituwa kumushiinda shavo pefimbo kwa li e ke va talela po efimbo lokomatango.
Okwa li taku hokolololwa kutya ponhele opo va hangwa opa li yoo okandini kashafuluka.
Amakali okwa ti omalutu ovakulupe aa okwa ningilwa omakonakono molwaashi okwa li pe na omipopyo dokafekela.
Eshi a kwatafana naKundana, omunambelewawiliki koshikondo shetengeneko longhalo yomhepo Odillo Kgobetsi okwa ti
momwedi Novomba otaku kala ku na odula ihapu i na oushelu noshoyo omhepo.
Okwa kumaida oshiwana opo shi kale sha ngungumana shi li meenduda ngeenge ku na odula i na oushelu nomingungumo shaashi eshi osha nyika oshiponga.
Okwa weda po ta ti oshiwana nashi xulife po okukala tashi longo momapya ile okukala tashi tu oilya koshini pefimbo lodula tai shela shaashi eshi ohashi dulu okueta oshiponga ile efyo.
Kgobetsi okwa ti ovakulunhu nava kale tava yandje ouyelele kounona opo va xulife po okukala tava danauka ile tava ningi eweelelo ngeenge ku na odula tai shela.
“Ovalifi voimuna ngaashi oikombo nava xulife po okukala tava ka yaama odula koshi yomiti shaashi okashelu kake hole omunhu e li koshi yomuti,” Kgobetsi ta ti.
Okwa weda po ta ti oshiwana inashi pumbwa okukala shi li mumwe noinamwenyo ngaashi eembwa, oumbishi ile oikombo ngeenge ku na odula tai shela shaashi eshi oha shi eta noupu okashelu ka kale ka kwata ovanhu.
fhamalwa@nepc.com.na